Garaipen gozoa txapelketari agur esateko

Eñaut Urreistik eta Gorka Sorozabalek bi setetan irabazi diete Thomas Urrutia eta Thibault Basqueri Eusko Label Winter Series txapelketaren finalaurrekoen ligaxkako azken partiduan.

Ane Maruri Aransolo

Gernika-Lumo

2025/02/11

Hasi zuten eran amaitu dute Eusko Label Winter Series txapelketa Eñaut Urreisti eta Gorka Sorozabalek: garaipenagaz. Gazteak diren arren, elkar ondo ulertu eta esperientzia irabazi dute txapelketak iraun bitartean, eta azken partidua da horren erakusle. Izan ere, Urrutia eta Basqueri bi setetean irabazi zieten atzo (otsailak 10): 15-11 eta 15-7.

Nagusitasunez gailendu ziren Jai Alaiko partiduan mutrikuarra eta lapurtarra, bai aurrean bai atzean, izan ere, Thomas Urrutia eta Thibault Basque ez ziren fin aritu.

Edozelan ere, 0-4ko markagailuagaz galtzen hasi ziren Urreisti eta Gorka. Kantxara egokitzea kosta zitzaien, Amerikako Estatu Batuetako joan-etorriek eraginda edo, ze kantxara eta materialera ohitu beharra izan zuten. Lau puntuko alde horren ondoren, baina, launa berdintzea lortu zuten Urreistik eta Gorkak, eta berdinketagaz jarraitu zuten 11 tantoetara ailegatzerakoan ere.

WInter Series txapelketaren finalaurrekoetako ligaxkako azken neurketa.Eraman

Atzean seguru eta sendo agertu zen Gorka, eta Urreistik gehiago asmatu zuen aurrean. Denetara, partida osoan, hiru horma-biko jaurti zituen, kontrakantxako sarearen ondotik, ia espazio eta angelurik barik. Gorkak, berriz, txula ederra bota zuen 14-11koa egiteko. Lehen jokoko azken tantoa, baina, mutrikuarrak egin zuen, sahietseko posturan egindako tantoagaz: 15-11.

Bigarren jokoaren hasieran hobera egin zuen Urrutiaren jokoak, baina moreek seina berdindu arte eutsi zioten bikote laranjaren erritmoari. Hortik aurrera, jaun eta jabe izan ziren, eta aurrelari mutrikuarraren tanto bikainez gozatu zuten ikusleek: errebotetik zuzenean zabalera bota zuen 4-3koa nabarmentzekoa izan zan, baita eskuinez aurrelariak engainatu eta zabalean goitik behera utzitakoa (10-6).

Hain zuzen ere, azken hori izan da partiduko tantorik onena. “Tanto polita izan da. Zabalera bota dut asko pentsatu barik, horrela botatzen ditut nik, eta ondo atera da eta pozik gaude”, onartu du Urreistik. Gainera, onartu du beste bikoteak baino gehiago asmatzea izan zela atzoko partida irabaztearen gakoa: “Besteak baino gehiago asmatu dugu. Ez da izan jokatu dugun partidarik onena, baina lehenengo setaren lehen zatitik aurrera errakuntza gutxiago egin ditugu eta hor egon da gakoa”. Hain zuzen ere, Gorkak onartu zuen hasieran kosta egin zitzaiela partidan sartzea: “Daniako frontoitik hona etortzea nabaritu dugu. Kantxa desberdina da hau, baita erritmoa ere. Hasieran apurbat kostatu zaigu, baina gero, ondo aritu gara”.

Txapelketan ezustekoa eman duen bikotea izan da eurena, maila ona eman duena. “Aurretik ez geneukan elkarrekin asko jokatuta, baina txapelketa honetan jakin dugu bata bestearengana egokitzen, eta AEBtan ere batera gaudenez, ondo aritu garela uste dut. Finalaurrekoetan ez genuen maila ona eman: Aritzen aurka lehen set ona egin genuen, baina zorte eskasa izan genuen eta gero ez genuen gure jokoa erakutsi. Gaur hobeto aritu gara, ez behar bada gure mailarik onenean, baina erakutsi dugu nola jokatzen dugun”, onartu du aurrelari mutrikuarrak.

Finala, begibistan.
Finalaurrekoetako ligaxkako azken norgehiagoaren ostean, finalaren atarian gaude dagoeneko. Laugarren aldia amaitzeko finala besterik ez da falta: Aritz Erkiaga, Ion Ibarluzea, Ludovic Ladutxe eta Mikel Mantzisidor izango dira protagonistak. Lehenengo biek aurreko urteko txapela berriro ere janztea bilatuko dute, eta besteek faboritoak gailentzea eta Erkiaga-Zabala, Beaskoetxea-Lopez eta Erkiaga-Ibarluzea bikoteen zerrendan hurrengoak izatea.

WInter Series txapelketaren finalaurrekoetako ligaxkako azken neurketa.Eraman

Partidua domekan izango da, 12:00etan, eta zuzenean ikusi ahalko da ETB 1en eta eitb.eus webgunean. Aurretik, baina, material aukeraketan ze motatako pilotak aukeratzen dituzten ikusiko dugu, eguenenan.