Kolorez bete dituzte kaleak

Andra Mari eta Santa Eufemia jaietan murgilduta daude bermeotarrak, eta horietako egun handienetakoaz gozatzen ari dira gaurkoan [irailak 9]: Arrantzale Egunaz.

Zaloa Iturbe San Jose

Bermeo

2024/09/09

Jaia dago itsasoan, jaia baserrietan, jaia herrian. Izan ere, egunaro-egunaro kalean ibiltzeko egunak ailegatu zaizkie bermeotarrei: hasi dituzte Andra Mari eta Santa Eufemia jaiak, eta lehen jai egunetako giroak ez du etenik izan asteburuan. Jaitsiera koloretsuagaz hasi zituzten festak zapatuan, eta Andra Mari eguna domekan ospatu eta gero, Arrantzale Eguna berezi eta herrikoian murgilduta dabiltza gaur [irailak 9].

Lagun artean, familian zein kuadrillan, egun goibela alaitasunez jantzi dute bermeotarrek. Goiko plazatik San Frantzisko enparantzarainoko bidea kalejiran egin dute, irribarrea ahoan eta poztasuna aurpegian zutela. Zelan ez, ez dira falta izan hainbat koloretako talko-hautsak eta fanfarriako kideak, ez eta trikitilariak ere, jai giroa berotzeko. Apurka-apurka eta euria bidelagun zutela, Taraskaraiñoko bidea osatu dute, eta Xixiliri legez, Taraskari ere jaietako zapia jarri diote, lora eskaintza egiteagaz batera.