Bihar, XII. Bertoko azoka Ean
Bihar [abuztuak 17] Ean, Bertoko azoka izango da, XII. aldiz. Horretarako, Bertoko azokak eta Eako Udalak, goiz guztiko egitaraua prestatu dute.
Goizeko 10:00etan emango dio hasiera XII. Bertoko azokak, Ean. Kasu honetan, Arritola plazan. Bedarokela izango da azokari hasiera emango diona, hain zuzen. Ondoren, 11:00etan “askotariko postuak” zabalduko dituzte Aurrera pilotalekuan: Ortuariak, Bedarokela, Ogia, Txarrikiak, Eztia, Iparraldeko gazta, Bertoko guztia eta nafar pasta, besteak beste. Horrekin bat eginez, artisautzari ere keinu egingo dio Eak zapatuan [abuztuak 17]. “Bertoko ortuetako otzaren” zozketa eta enkantea ere hartuko du Bertoko azokak.
Postuez gain, ikuskisun desberdinez gozatzeko aukera ere izango da Ean. Batik bat, Ardi-ile mozketa 12:30etan, Neskak kirolari 13:00etan, eta Amaiera dantza 14:00etan. Horrez gain, goiza girotzeko helburupean, txosnan falda pintxoak eta edaria egongo da eskuragarri, beti ere, txitulari eta trikitilariek, eta Ieko kantuzaleek azoka uneoro girotuz. Antolatzaileek, Eara gerturatzeko deia zabaldu dute, “baserritar erara jantzita“.
