Giro ezinhobea, Urdaibai Dantza Taldearen urteurrenean
Foruko Urdaibai Dantza Taldearen 55. urteurrena ospatzeko elkartu dira gaur []uztailak 20] foruarrak. Taldeak izandako lehen banderari omenaldia egin diote.
Foruko Urdaibai Dantza Taldetik pasa diren belaunaldi ezberdinetako dantzariek bat egin dute gaur [uztailak 20] taldearen 55. urteurrena ospatzeko. Urtemuga berezi horri merezi duen omenaldia egiteko prestatu duten egun guztiko egitarauaz gozatzen ari dira foruarrak; izan ere, 11:30etan zuten jarrita hitzordua eta festak iluntzera arte iraungo du.
Diana taldeko txistulariek girotuta, 11:30etan ekin diote ospakizunari Foruan, txupinazoa jaurtitzeagaz batera hamaiketakoagaz gozatu baitute dantzari txiki eta ez hain txikiek; txistorra eta bakailaoa ez dira falta izan ekitaldi formalagaz hasi aurretik indarrak hartzeko.
Goizeko une hunkigarrena 12:30 aldera iritsi da, Mikel Magunazelaia Foruko alkateak taldearen 50. urteurrenean udaletxean gordetako Urdaibai Dantza Taldearen lehen bandera atera duenean. “Taldearen beste urte ditu gure lehen banderak, 55. Orain dela bost urte, 50. urteurrenean udalari eman genion hobeto gorde eta zaintzeko. Gaur atera egingo dugu, eta gurekin izango dugu egun guztian zehar. Hartuko dutenak gaur egun dantzan dabilen dantzari nagusiena, Jesus, eta gaztetxoena, Ane, izango dira”, azaldu dute dantza taldekoek. Jarraian, belaunaldi ezberdinetako dantzariek bat egin dute bandera omentzeko Agurra dantzatuz. Segituan, urtemuga ospakizunera gerturatu diren guztiek talde argazkia atera dute, bandera eta guzti.
Egitarauak ez du etenik izan. Umeak Dantzarien Plazan bildu baitira Dantza Kirolez gozatzeko. EINGO taldeak girotutako poteoa ere ez da falta izan.
Arratsaldeko laurak inguruan mahai inguruan bildu dira foruarrak, jaietako karpan. Dantza taldeko dantzari eta dantzari ohiek lelo-zapi berezi bat jantzi dute, 55. urteurreneko oroigarri gisa. Arratsaldean jarraituko dute ospakizunekin, Eingo taldeak jaia girotzen jarraituko baitu. Gainera, Dantza kirolak, Urdaidance summer series, zozketak eta sekretuan gorde dituzten beste hainbat sorpresa izango baitituzte aukeran. Eguna Xaibor disko festagaz biribilduko dute, 19:00etan.
