1200 lagun inguruk jokatuko dute Pasealekuan
Futbolean 71 taldek jokatuko dute; saskibaloian 29k; eta esku-pilotan 14 bikote egongo dira. Winner aplikazioan ikusi ahal izango dira partiduetako emaitzak.
Pasealekuko Torneoko saskibaloi partidua. Udako kirol txapelketarik garrantzitsuenak ate joka daude. Barikuan[ekainak 21] hasiko dira Pasealekuko futboleko, saskibaloiko eta esku pilotako txapelketak, eta abuztuaren 2ra arte girotuko dute arratsaldez Pasealekua. Urterik urtera hazten doazen txapelketak dira Gernika-Lumokoak, eta aurton ere igo egin da izena eman duten taldeen kopurua: Orotara, 1200 lagun inguruk parte hartuko dute.
Ohikoa denez, futboleko txapelketan apuntatu dira talde gehien. 71 talde izango dira Gernika Erabil Futbol Salak antolatutako txapelketan; joan den urtean baino 12 talde gehiago daude. Kategoriei dagokionez, 12 talde benjamin, 10 alebin, 11 infantil, 7 kadete eta 31 senior izango dira. Aurton ere 22 minutuko bi zati izango dituzte partiduek, eta bost minutu izango dituzte zatien artean; legedia ez da aldatu. Jakinarazi dutenez, talde bakoitzari kolore bateko kamisetak emango dizkiote partidak jolasteko. Kamiseta horiek zenbakiak izango dituzte, eta kamisetak hartuz gero, horiekin jokatu beharko dira neurketak.
Saskibaloian 29 taldek parte hartuko dute–iaz baino 10 talde gehiagok–: 8 benjamin-alebin, 8 infantil-kadete eta 13 senior. Argitu dutenez, hamar minututako lau zati jokatuko dituzte, eta ez da denbora geldituko; partidua berdintsu joanez gero, azkenengo bi minutuetan baloia kantxatik ateratzean geldituko da erlojua. Gernika KESB arduratu da saskibaloiko txapelketa antolatzeaz, eta nabarmendu dutenez, “antolakuntzatik kirolaren berezko balioak sustatzea” bilatzen dute. Hori dela eta, “laguntza eta elkarlana” eskatu diete parte hartzaileei, giro “polita eta errespetuzkoa” sortu daiten.
Esku-pilota txapelketa antolatzeaz Arkupe Pilota Taldea arduratu da. Guztira 14 bikotek parte hartuko dute txapelketan. Partiduak 22tantotara jolastuko dira, eta gainontzeko kiroletan ez bezala, bikote bakoitzak ordezko pilotari bat izan ahalko du. Pilotariek, gainera, euren aurreko edo osteko partiduan epaile lanak egin beharko dituzte.
Emaitzak ikusgai.
Antolatzaileek aurreratu dutenez, aurton ere Winner aplikazioa jarriko dute eskuragarri txapelketetako emaitzak jakinarazteko. Horrela, App Store eta Play Storen eskuragarri dagoen aplikazioa deskargatzea gomendatu dute.
