Ajangizko udalekuetarako izena eman daiteke
Ekainaren 19a aurretik izena eman beharko dute interesatuek. Hilaren 24tik uztailaren 12ra artean izango dira Mendietan, bi egunetan salbu.
Eako erreka garbitu zuten iaz udalekuetakoek. Ajangizko Udalak udalekuak antolatu ditu Mendietan, eta horietan parte hartu gura dutenek hilaren 19a aurretik izena eman beharko dutela jakinarazi du, 94 625 19 13 telefono zenbakira deituta.
Zehaztu dutenez, hiru eta bost urte bitarteko umeentzako udalekuak ekainaren 24tik uztailaren 12ra bitartean izango dira, eta sei eta bederatzi urte bitartekoenak, aldiz, uztailaren 1etik 12ra artean.
Jakinarazi dutenez, uztailaren 4an udalekua Kanpantxun izango da, han egingo dutelako baso eskola tailerra hiru eta hamabi urte bitartekoentzat, 09:30etik 13:30era. Saio horretan, zuhaitz desberdinek dauzkaten ezuagarri bana edo bina azalduko dituzte antolatzaileek, gero, partaideak taldeka jarri eta jolasa egiteko. Izan ere, zuhaitz bakoitzaren azpian zesta bat edo ontzi bat jarriko diete, eta barruan dituzten hostoak, enborrak, azalak… dagokien zuhaitzagaz jarri beharko dituzte. Gainera, naturan aurkitutako hosto eta adarrekin herbario moduko bat egingo dute.
Uztailaren 11n, aldiz, baso eskola tailerra kultur etxean egingo dute, 09:30etik 13:30era artean. Lehenengo, ibaira hurreratuko dira, eta kate bat osatuko dute parte hartzaileekin: “Ibaitik ura hartu eta katean zehar pasatuz gero, kateko azkenak ur ontzira bota beharko du”. Gero, denen artean, ibaiko eremu seguru batera joango dira, eta presa egiten ahaleginduko dira, jarraian desegiteko. Horrez gain, ume bakoitzak berari gehien gustatzen zaion arroka hartu eta etxera eramango du.
