Ibarrangelutarrak oraindik jai gosez daude
Gorpuzti jaien lehen astea ospatu dute Ibarrangelun. Zapatuan [ekainak 8] emango diote amaiera herriko jai nagusiei.
Argazkia: Bermeoko Erraldoiak. Eguenean hasi zituzten Gorpuzti jaiak eta, urtero legez, herritarrek erantzun paregabea eman dute. Aurten, Lorea umeen dantza taldeak jaurti du txupina eta ibarrangelutarrek “emozioz” bizi zuten une hura: “Umeak izan ziren protagonista; bertso hunkigarri bat prestatu eta abestu zuten”.
Txitularien kalejira. Argazkia: Marian Olano.
Barikuko trikitalien kalejira edota Kuter taldeak eta Joxpa erromeriak emandako kontzertuak azpimarratu dituzte antolatzaileek. Zapatuan, Bermeoko Erraldoiek kalejirarako tropel aparta osatu zuten herriko txistulariekin, gaiteroekin eta buruhandien konpartsagaz bat eginda.
“Herri bazkarian 200 lagun bildu ginen, eta bazkalostea giro bikainean eman genuen”
Jaiak goia jo zuen bazkari herrikoiagaz: “200 lagun bildu ginen, eta bazkalostea giro bikainean eman genuen, besteak beste, mahai gainekoa dantzatuz”. Hura ez zen jaietako bazkari bakarra izan. Laga, marinu eta arrantzaleena egin zuten. Aurten, estreinakoz, haritz bat landatu dute, “hildako marinuen gomutaz”.
Hildako marinuen omenez eginiko haritz landaketa. Argazkia: Marian Olano.
Zapatuan burutuko dituzte jaiak, baia oraindik badago ze ospatu: urteroko gailurretako bat, paella txapelketa herrikoia, egingo dute. “Herritar ugari” biltzen ditu lehiaketak, eta aurtengo aurreikuspenak ere “itxaropentsuak” dira. 12:00etan zabalduko dute txapelketarako izen ematea, eta paellak 14:00etarako prest eduki beharko dituzte.
Ume, gazte eta nagusien ohiko esku pilota partiduez gain, emakumeen pala partidua bultzatu gura dute aurten
Emakume kirolariei plaza.
Aurten, pala moduko “kirol gutxitu” bati eta emakumezko kirolariei protagonismoa emango diete. Ume eta gazteen binakako esku pilota partiduen ostean emakumezkoen pala partiduaz gozatuko dute: Bidasolo eta Anitua Zugaza eta Landajoren aurka. Jarraian, nagusi mailako gizonezkoak kantxaratuko dira: Bakaikoak eta Morgaetxebarriak Larrazabal eta Lizeaga edukiko dituzte aurrez aurre. Mariatxien emanaldi ibiltariak eta Siesta Destroyer DJak emango die amaiera Gorpuzti jaiei.
