Produktuak eta herriak bat egiten duten puntua
Bihotza Arostegi sukaldari bermeotarrak hegaluzea zelan zatitu daitekeen eta arrainaren zati bakoitzarekin zer-nolako errezetak presta daitezkeen azalduko du Arrain Azokan emango dituen saioetan.
![](https://busturialdea.hitza.eus/site/files/2024/05/bihotza_arostegi_sukaldari-1200x675.jpg)
Bizitza osoa sukaldaritzari emana. Ibilbide luzea produktuaren mesedetan. Errezeten bilakaeraren testigu. Produktuaren aberastasunaren maitale. Bihotza Arostegi bermeotarra gazte-gaztetatik hasi zen ezkaratzean beharrean. Eskualdeko hainbat eta hainbat jatetxetan jaso zuen sukaldaritza formakuntza. Horrez gain, betidanik eduki du sukaldeak eskaini ditzakeen zerbitzu eta onura guztiak zeintzuk diren ezagutzeko interesa; ikastetxeetan nahiz egoitzetan zelan lan egiten den ere ederto ezagutzen du. Ez hori bakarrik: 2005az geroztik, sukaldaritza irakasle modura dihardu, Leioan. Ezkaratzak gordetzen duen sekretu oro inork baino hobeto ezagun du.
Bihotza Arostegi: “Hegaluzea herrian eta herriko sukaldaritzan betidanik presente egon den produktua da”
Bermeoko Arrain Azokaren lehen urratsak zuzenean bizitakoa da Arostegi, sarri parte hartu baitu egitarauan. Aurten, hegaluzeak Bermeon duen tradizioa eta erroa nabarmenduko du. “Betidanik herrian eta herriko sukaldaritzan presente egon da produktu hori. Dena dela, hainbat herritarrek –gazteenek, esaterako– gutxi samar dakite haren inguruan; hain liluragarria eta preziatua den produktu hori lantzea izango da neure asmoa”. Unai Urresti sukaldariagaz elkarlanean, oinarri teoriko eta praktikoan ardaztuta dagoen ordu erdi inguruko proposamena da Arostegik esku artean duena. Gaur [maiatzak 17], bihar [maiatzak 18] eta etzi [maiatzak 19] ariko da azokaren gune gastronomikoan: gaur, 19:30ean; bihar, 18:30ean eta 19:30ean; etzi, berriz, 11:30ean eta 12:30ean.
Hegaluzearen zatiketa eta prestakuntza alde teorikotik azalduko dute lehenik, errezeten praktikotasunera salto egin orduko
Teoriatik eta praktikatik.
Saioaren lehen tartea hegaluzearen eta hegalaburraren arteko aldeak argitzera emana izango da, “oraindik askok eta askok ez baitituzte bereizten”. Hori azaltzeko, ikus-entzunezko bat ere baliatuko dute. Behin arraina ondo ezagututa, eskaintzen dituen zatiez mintzatuko da sukaldaria. Mintzatu ez ezik, hegaluzea tokian bertan zatituko dute.
Lehen berbatik azkenengora, agerikoa da produktuak beragan pizten duen pasioa: “Hegaluzea arrain oso balioanitza da; pila bat aukera ematen du kozinatzerakoan. Adibidez, buztan inguruagaz marmitako eder askoa egin daiteke; errezeta horren teknikak urratsez urrats zelan egin argituko dugu. Mendrezka edo atun belarria labean, parrilan edota plantxan zelan prestatu ere azalduko dugu, baita hegaluzea bermeotar erara zelan prestatu irakatsi ere, hau da, piperrekin eta tomateagaz”. Hegaluzeagaz egindako “entsalada gozo bat” zelan kozinatu edo hegaluzea kipulagaz eta tomateagaz zelan aurkeztu ere argituko dute.
“Oro har, edonork egiteko moduko errezetak proposatuko ditugu”
Arrain nahiz itsaskien kontserba industriak Bermeon duen pisu nabarmenaren jakitun, sukaldariak atal berezia eskainiko dio hegaluze kontserba propioak zelan egin irakasteari: “Nork bere kontserba etxean bertan prestatu ahal izatea da helburua. Oro har, edonork egiteko moduko errezetak proposatuko ditugu, sukaldaritza eta produktua herritarrei ahal beste hurreratzea baita geure jomuga nagusia”.