Undabaso baso bihurtzen jarraitzeko hitzordua
Landaketa jardunaldia prestatu du Lurgaia Fundazioak Undabason. Zapaturako [urtarrilak 13] jarri dute hitzordua, eta bertaratu gura dutenek izena eman beharko dute.
Undabaso baso bihurtzeko zereginean jarraituko dute zapatuan [urtarrilak 13]. Izan ere, etorkizunean basoa izango den eremu horretan landaketa jardunaldia prestatu du Lurgaia Fundazioak. Hala, herritarrei bertaratzeko deia egin diete antolatzaileek: “Aurreikuspenen arabera, egun zoragarria izango da, Undabason landatzeko aproposa, mendian goiza lagunartean pasatzeko eta tortilla pintxo batzuk jateko ederra”.
Horretarako, interesatuek izena eman beharko dute info@lurgaia.org helbide elektronikora idatzita, eta baieztapena jasotzera itxaron beharko dute. Bertan, izen-abizenak, adina, jatorrizko udalerria eta kontakturako zenbakia zehaztu beharko dituzte interesatuek.
Zapaturako hitzordurako 09:00etan jarri dute hitzordua Ibarruriko Andra Mari elizako aparkalekuan, eta 13:30ak arte egongo dira Undabason.
Antolatzaileek gomendatu dute ura edo fruta eramateko, baita mendiko arropa eta oinetako erosoak janzteko ere, eguraldiaren aurreikuspenaren araberakoak.
