Energia komunitate bat sortzeko lehen pausoak emango dituzte Ajangizen
Ajangizko Udalak herri bilera deitu du biharko [abenduak 14], energia komunitate bat sortzeko lehenengo pausoak emateko. 19:00etan, kultur etxean jarri du hitzordua, eta herritarrei bertaratzeko deia egin diete.
Bileran, Barrizar energia zerbitzuaren ordezkariek energia komunitateen funtzioez berba egingo dute, eta horien abantailak aipatuko dituzte; besteren artean, zer den energia komunitate bat, zeinek parte har dezakeen edota zein abantaila eskaintzen dituen azalduko dute.
Horrez gain, komunitatearen sorreran eman beharreko pausoak zehaztuko dituzte: udalak zelan lagun dezakeen sorkuntzan, ze bazkide mota dauden, sortze prozesuaren epea zelakoa den… Gainera, behin komunitatea sortuta garatu daitezkeen ekintzak zeintzuk diren ere azalduko dute.
