Minbiziaren eragina eta ikerketaren garrantzia azpimarratzeko astea
Minbiziaren Aurkako Ibilbidearen baitan, hitzaldiak emango dituzte gaur [azaroak 29] zein bihar [azaroak 30] Bermeoko Nestor Basterretxea aretoan. Gaurkoan Esther Alvarez psikologoak ¿Cómo afecta el cancer a las relaciones y las emociones? hitzaldia eskainiko du, 18:00etan. Bihar, ordea, Arkaitz Carracedo ikerlari sarituak emango du La investigación como motor para mejorar el tratamiento del cancer hitzaldia, leku eta ordu berean.
Hitzaldiez haratago, erakusketa eta informazio-mahaia daude ikusgai bihar arte, Nestor Basterretxea aretoan. Erakusketak, minbiziaren beraren zein gaixotasunaren inguruko ikerketaren ibilbidea ezagutzeko aukera ematen du, tabakismoa prebenitzeko informazioa aurkeztearekin batera.
Horrez gain, Bermeoko boluntarioek Minbiziaren Aurkako Elkarteak eskaintzen dituen zerbitzu eta baliabideen berri ematen die bertara gerturatzen direnei: “Elkarteari buruzko informazioa emateagaz batera, Bilboko egoitzara deitzeko esaten diegu, han psikologoak, laguntza medikoa, ekonomikoa eta soziala eskaitzen dituztelako”. Mari Carmen Solis, Isabel Lopez eta Lukene Fernandez boluntarioek informazioa eman eta jendartean ezagutza zabaltzeko eta kontzientziazioa lantzeko jarduerak antolatzearen garrantzia azpimarratu dute.
Minbiziaren Aurkako Elkarteak antolaturiko ibilbide honi bukaera emateko, zapatuan [abenduak 2], goizean zehar, azoka solidarioa egongo da Minbiziaren Aurkako Elkartearen Erreten Lamerako lokalean: “Bertan gabonetako objektuak, arboletan eskegiteko lanak, eta bestelakoak erosteko aukera egongo da; guztiak boluntariook eginak dira”.
