Beste eraso matxista bat salatu du Bermeoko Udalak
Segurtasun Sailetik jakinarazi dute, udaltzaingoak gizon bat atxilotu duela indarkeria matxista leporatuta. Bermeoko Mugimendu Feministak elkarretaratzea deitu du gaurko, 19:00etan, Lamerako harrizko bankuan.
Gaur goizaldean [uztailak 7] Bermeon gertatutako eraso matxista salatu du Bermeoko Udalak. Segurtasun Sailetik jakinarazi dute gauerdian Bermeoko Udaltzaingoak gizon bat atxilotu duela indarkeria matxista egotzita; dagoeneko epailearen esku utzi dute. Bermeoko Mugimendu Feministak elkarretaratzea deitu du gaurko, 19:00etan, Lamerako harrizko bankuan.
Bermeoko udal ordezkariek gaitzespenik “sutsuena” adierazi dute: “Azken asteetan gertatu den hirugarren kasua dugu hau, eta argi adierazi gura dugu ekintza hauek onartezinak direla eta ez dutela lekurik gure herrian”.
Era berean, gertutasuna eta elkartasuna adierazi diete emakumeari eta bere ingurukoei; “gure esku dagoen guztian laguntzeko prest gaude”.
Berriro azpimarratu dute pertsonen duintasuna, sexu askatasuna eta integritate fisikoa “eskubide urraezinak” direla: “Argi geratu da indarkeria matxista lehen mailako gizarte arazo bat dela, estrukturala eta kolektiboa”. Bermeoko Udala “kontziente da egoeraren larritasunaz”, horregatik, herritarrei “bortizkeria matxistaren aurkako jarrera eta konpromisoari eusteko” dei egiten diete, “inoiz baino gehiago erne jarraitzeko, indarkeria jasaten ari diren emakumeek erakundeon eta gizarte osoaren babesa jaso dezaten”.
Indarkeria matxista “errotik eta behin betiko desagerrarazteko” lanean jarraituko dutela adierazi dute, eta gaineratu dute ahaleginak egingo dituztela “elkarbizitzan oinarritutako gizarte berdinzale” bat lortzeko, “azken asteetan gertatutako erasoak sekula ez errepikatzeko”. Argi eta garbi adierazi gura dute: “Gure herrian ez dugu inongo eraso matxistarik onartuko”.
Udaletik herritarrak deitzen dituzte mugimendu feministak antolatu ditzakeen mobilizazioetan parte hartzera.
