Haizea Telleria da aurtengo Bizkaiko Eskolarteko txapelduna
Bizkaiko idatzizko eta bat-bateko txapelketak jokatu ziren zapatuan [maiatzak 27] Gernika-Lumon; 200 gaztetik gora elkartu ziren Astran.
Bizkaiko eskolarteko bertso idatzien finala eta bat-bateko finala jokatu zituzten bertsolari gazteek zapatuan [maiatzak 27] Gernika-Lumoko Astran, eta Haizea Telleriari Onintza Enbeita bertsolari muxikarrak jantzi zion Bizkaiko Eskolarteko lehiaketaren txapela.
11:30etik aurrera, bat-bateko finala jokatu zuten zortzi finalistek: Telleria, Aiala Irurtia Montero, Enara Gallastegi Barrenetxea, Ixone Asategi Narbaiza, June Diaz Franco, Kelmene Abaitua Isazelaia, Maialen Lago Iturriaga eta Naroa Jaio Jaio.
Zortziko handian eta txikian ofiziotan egin zuten gazteek eta, ostean, bakarka, gaiari erantzun behar izan zioten. Hori eginda Asategi eta Telleria izan ziren puntu gehien batu zituzten bi bertsolariak eta, beraz, buruz burukora sailkatu ziren. Puntuari erantzun eta gai bati bertso bana bota behar izan zioten atal horretan, eta Telleria gailendu zen.
Buruz burukoa jokatu zuten bi bertsolariak zapatuan [ekainak 3] Iurretan jokatuko den Euskal Herriko Eskolarteko finala lehiatzeko txartela eskuratu dute.
Eskolarteko Bizkaiko finala, Astran. Argazkia: Bizkaiko Bertsozale Elkartea.
Idatzizko finala. Bertsozale Elkarteak eta Ikastolen Elkarteak elkarlanean antolatutako ekimena da eskolartekoa, eta 200 gaztetik gora bildu zituen zapatuan kulturarako fabrika sozialean. Izan ere, 200 parte hartzaile batu ziren idatzizko finala jokatzeko; aurretik ikastetxe eta herrietan egin dituzte finalaurrekoak, LH5etik batxilergora arteko mailetan.
Idatzizko lehiaketaren saridunen artean, eskualdeko bertsolariak egon dira. Hain zuzen ere, DBH3. mailatik Batxilergora arteko kategorian, Garoa Oleaga Gernika BHIko ikasleak jaso zuen lehenengo saria. DBH 1go mailakoen kategorian, bigarren saria eskuratu zuen Haizea Rotaetxe Markina BHIko ikasleak.
SARIDUNAK:
- LH 5. mailan.
- Saria: Lur Koto. Urretxindorra Ikastola
- Saria: Iraide Artolozaga. Ander Deuna Ikastola
- Saria: Unai Urrutia. Urkitza eskola
- LH 6. mailan.
- Saria: Leire De La O. San Jose Jesuitak
- Saria: Arai Elias. Azkue Ikastola
- Saria: Laida Martinez. Andra Mari Ikastola
- DBH1. mailan.
- Saria: Aiala Bilbao. Lauaxeta Ikastola
- Saria: Haizea Rotaetxe. Markina BHI
- Saria: Amaiur Betanzos. Urretxindorra Ikastola
- DBH2. mailan.
- Saria: Iradi Barrenetxea. Arratia BHI
- Saria: Jon Gaztelurrutia. Txintxirri Ikastola
- Saria: Markel Elosegi. Txorierri BHI
- DBH3-DBH4-Batxilergoa
- Saria: Garoa Oleaga. Gernika BHI
- Saria: Jasone Gabiria. J.B. Eguzkitza Meabe
- Saria: Naia Martin. Zalla BHI
