Ibilgailuei zuzendutako seinaleztapen berria jarri dute Bermeon
Seinaleztapen berria jartzera 39.500 euro inguru bideratu dituzte, eta horiekin "herri barruko ibilgailuen mugikortasuna murriztu, oinezkoei lehentasuna eman, emisioak murriztu eta bermeotarren bizi kalitatea hobetzea" dute helburu.
Argazkia: Bermeoko Udala Udalerriko kaleetako balizajearen mantentze, zabaltze eta berritze planaren barruan eta ibilgailuei zuzendutako egungo seinaleztapena hobetzeko helburuagaz, udalak herriko seinaleak berritu ditu. Herritarren eskaerei erantzuten dien ekimena dela zehaztu dute, eta kale eta auzo bakoitzaren errealitatera egokitutako seinaleztapena jarri dutela aipatu dute.
“Azken urteetan egindako inbertsioei esker, zirkulazioaren norabideak aldatu egin dira, zerbitzu berriak martxan jarri eta saihesbidetik sarrera-irteera berria ere zabaldu da, besteak beste. Horrek guztiak zirkulazioa berrantolatzeko aukera eman du”, azaldu dute udal arduradunek.
Seinaleztapen berria jartzera 39.500 euro inguru bideratu dituzte, eta horiekin “herri barruko ibilgailuen mugikortasuna murriztu, oinezkoei lehentasuna eman, emisioak murriztu eta bermeotarren bizi kalitatea hobetzea” dute helburu. Azaldu dutenez, ekimen honen bidez, “erabiltzaileen segurtasuna indartuko da, mugitzeko modu berriak txertatuko dira eta seinaleak igortzen dituzten mezuak errazago ikusi eta ulertuko dira”. Elementu guztiak euskaraz eta gaztelaniaz jarri dituzte, “hobeto ulertzeko”.
Argazkia: Bermeoko Udala
Herri guztian plaka berriak ordezkatzeaz gain, “herriko zirkulazioa arinduko” dela aipatu dute udal arduradunek: “Helburu nagusietako bat herrira egun pasa datozen ibilgailuak Itxas Gane eta Udal Azokako udal aparkalekuetara bideratzea da, herriaren erdiguneko zirkulazioa nabarmen murriztuz eta, era berean, porturantz doan zirkulazio fluxua murriztuz”. Hori posible izateko, herriko sarreretan aparkaleku bi horietan libre dauden leku kopurua iragartzen dituzten seinale digitalak jarri dituzte.
Bestalde, Artza eta Erreten inguruan, “berrurbanizatu eta erdi-oinezkotu” den zeharbidean ere ibilgailuen abiadura kontrolatu eta informazioa ematen duten inforradarrak instalatu dituzte.
