Elkarlana oinarri duen XI. Rudelari Eguna ospatuko dute
Ohiko formatura bueltatuta, rudelariek egun bateko egitaraua prestatu dute zapaturako [maiatzak 20].
Herriko kale eta txokoak ekimenez loratzen hasten dira udaberrian, eta udalerria “biziz eta kolorez” betetzen dute. Horietako ekimen asko Astrako eta inguruko eragileen “lan eskerga eta militantziari” esker jaiotzen dira, eta 11. Rudelari Egunean, “ezkutuan” geratzen den “komunitate handi” hori osatzen duten eragileen lana azpimarratu gura dute rudelariek.
Rudelari Eguna beti izan da reggae eszenako eragile eta lagunen topaleku bat, erreferentziazko hitzordua. “Gure komunitatea aktibatzen duen eguna da, harreman sareak sortarazi dituena eta batzeko aukera eskaintzen duena”, adierazi dute antolatzaileek. Eta, oraingoan ere Astra eta inguruko komunitatean lan egiten duten eragileen elkarlana edukiko dute Rudelari Egunean: bazkarian Lilibertsoko bertsolariak ariko dira bertsotan, eta Biztu Irratiko kideek elkarrizketak grabatuko dituzte egun guztian, gerora podcast bat sortu eta sarean zabaltzeko. “Bertso reggae bazkaria da aurtengo berritasuna. Lilibertsoko bertsolariak etorriko dira eta reggae doinuekaz bertsoak botako dituzte. Aldi berean, Biztu Irratikoak ere animatu dira gugaz egotera eta elkarrizketa batzuk grabatzera”.
Dioetenez, “beti” saiatzen dira erakunde eta elkarte desberdinekin lan egiten, euren asmoa “egun anitza” sortzea delako, “adin eta gustu guztietako pertsonei zuzendutako eguna izatea”, alegia.
Hala, aurreko edizioetan egin modura, jaialdia Astratik atera eta herrira eroan gura dute oraingoan ere. Ondorioz, ska, rocksteady eta reggae musikaz gozatzeko aukera zabala eta anitza edukiko dute herritarrek, bai udalerriko kaleetan, bai tabernetan, bai Astran.
Arratsaldean Bilboko Steady Rockets ska reggae talde gaztearen kontzertua egongo da Aterpe tabernan
Egunari hasiera emateko, Juan Kaltzada kaleko tabernetan elkartuko dira, eta “giroa berotzeko”, urteroko Poteo Sound Systema egingo dute: “Azken urteetan argitaratu diren kanta onenak zein klasikoak entzungo dira bozgorailutik”. Ostean, Astra Bertso Reggae bazkaria egingo dute: betiko indaba janaz gain, Lilibertsoko bertsolariek reggae doinuagaz botako dituzte bertsoak, “bazkari berezi eta originala osatuz”. Bazkarian parte hartzeko, @gerniska Instagram kontura idatzi behar dute interesatuek.
Arratsaldean, kaleak girotzeko helburuari jarraituz, Bilboko Steady Rockets ska reggae talde gaztearen kontzertua egongo da Aterpe tabernan. Urtero egiten duten euskal taldeen aldeko apustua berresteko kontzertua izango da Bilboko taldearena.
Gauean, berriz, Astra beteko du rude izaerak. Izan ere, The Moskito Bite taldearen kontzertuaz eta Bilbomatiksen agur birako azken aurreko kontzertuaz gozatzeko aukera edukiko dute bertaratzen direnek. “The Moskito Bite taldekoak Bartzelonatik datoz. Egungo reggae eta rocksteady eszenako talde fresko eta bikaina da, reggaearen eszenan modan dagoena”. Bueltan dagoen Bilbomatiks taldearen azken aurreko kontzertuaz ere gozatzeko aukera edukiko dute Astrara bertaratzen direnek: “Euskal Herriko reggae mugimenduko talde erreferenteetako baten azken aurreko kontzertua da. 2016an jo zuten euren azken kontzertua, eta sei urteren ostean, taldearen agur bira antolatu dute euren leku kuttun batzuetan jotzeko, tartean Gernikan”. Bira horregaz batera, euren azken LPa argitaratu dutela azaldu dute rudelariek, eta hori erakutsiko dutela gehitu dute.
“Zeppe eta Aterpe tabernen elkarlana ere funtsezkoa da guretzako, asko laguntzen digute. Guk lotzen ditugu kontzertuak, baina eurena da logistika lan guztia”
Egunagaz amaitzeko, Zeppera joango dira, Sir Gorka of Mondraren after partyan elkartzeko. “Zepperen urteurrena ere bada, eta erreferentea da gure eszenan. Zeppe eta Aterperen elkarlana ere funtsezkoa da guretzako, asko laguntzen digute. Guk lotzen ditugu kontzertuak, baina eurena da logistika lan guztia”.
Antolatzaileek herritarrak animatu dituzte Rudelari Egunean parte hartzera, “giro ona” egongo dela azpimarratuz: “Jendea gerturatu gura dugu mugimendura. Gozamenerako eguna da”.
EGITARAUA.
- Zapatua, maiatzak 20.
- 13:00. Poteo Sound System Juan Kaltzadan.
- 15:00. Bertso Reggae Bazkaria Lilibertsogaz Astran.
- 19:30. Kontzertua Aterpen.
- 22:00. Kontzertuak Astran: The Moskito bite eta Bilbomatiks.
- 02:00. Pintxada Zeppen: Sir Gorka of Mondra.
