Gernika SD: play-off postua lortzeko azken aukera
Gernika SDk Mutilveraren aurka jokatuko du etzi [maiatzak 14] liga erregularreko azken partidua. Gernika-lumotarrek bai ala bai irabazi beharra daukate, play-offen lehiari eusteko.
Iragan asteburuan San Juanen kontra 0-1 galdu ostean, Gernika SDk 2.RFEF mailako play-off postua eskuratzeko azken aukera edukiko du etzi [maiatzak 14]. Mutilvera taldearen kontra jokatuko dute liga erregularreko azkenengo jardunaldiko partidua, 12:00etan, etxetik kanpora. Talde gernika-lumotarrak ogibide oso gaitza edukiko du, play-offetara sailkatu ahal izateko. Hain zuzen, Mutilveraren aurkakoa irabazteaz gain, gainontzeko taldeen emaitzen pentsuan egon beharko dira. Sailkapena, beraz, ez dago bakarrik beraien esku.
Talde nafarraren inguruan galdetuta, denboraldiaren bigarren zatian “aldaketa nabarmena” jasan duela azaldu dute Gernika SDtik. Izan ere, entrenatzailez aldatu zuten denboraldi erdian, eta, orduz geroztik, taldeak “gora eta gora” baino ez du egin: “Baloia dutenean, arriskua sortzeko gaitasuna dute; defentsari dagokionez, oso sendoak dira”. Horri aurre egiteko, “antolatuta” jokatu beharko dute: “Geure atea hutsean mantendu beharko dugu, eta ditugun aukera denak aprobetxatu“.
