Gernika Rugby Taldea: mende erdi errugbiari lotuta
Taldearen 50. urteurrena ospatzeko askotariko ekintzak antolatu dituzte maiatza eta ekaina bitarterako. Zapatuan [maiatzak 13] errugby topaketak eta bazkaria egingo dituzte, Urbietan.
Klubak mende erdiko ibilbidea bete duela ospatzeko, maiatza eta ekaina bitarterako hainbat ekimenez osatutako egitaraua prestatu dute. Zapatuan [maiatzak 13] errugbi partiduak jokatuko dituzte Urbietan; egun osoan hainbat talde zelairatuko dira. 09:30ean, 12 urtez azpiko Bizkaiko herri arteko finala jokatuko dute Plentziako Kakarraldo eta Bilbo taldeek. Jarraian, 10:30ean, 14 urtez azpikoen txanda izango da; Plentziak eta Bilbok neurtuko dituzte indarrak.
Ondoren, beteranoek egingo dute jauzia zelaigunera. Gernika RTko beteranoen taldea Bizkaiko Otsoak selekzioaren kontra neurtuko da. Bizkaiko Otsoak, hain zuzen ere, hainbat herritako jokalari beteranoz osatutako selekzioa da: Elorrio, Durango, Mungia, Plentzia… 11:45ean, 55 urtetik gorako beteranoek jokatuko dute; 12:30ean, ostera, 35 urtetik gorakoek. Norgehiagoka denak amaitu eta gero, parte hartzaileen arteko talde bazkaria egingo dute, eta horrek zarratuko du eguneko egitaraua. Bazkari hori Gernika-Lumoko Rugby tabernan izango da, eta antolatzaileek 130 lagun inguru batzea aurreikusten dute.
Gernika-Lumoko Elai Alai aretoan taldearen ibilbidea erakusten duten argazkiez osatutako erakusketa ipini dute. Atal biko erakusketa da: batetik, klubaren historia bistaratzen duten 109 argazki fisiko egongo dira, eta, bestetik, diapositiba bidez 6.000 argazki erakutsiko dituen proiektorea dago. Klubekoek azaldu dutenez, argazkiak “hainbat iturritatik” jaso dituzte: “Klubak zituenez gain, jarraitzaileengandik, hurreko pertsonengandik edota prentsatik ere jaso ditugu”. Argazki erakusketa maiatzaren 19tik ekainaren 2ra bitartean egongo da ikusgai, doako sarreragaz.
Ekainaren 10ean klub bazkaria egingo dute, eta txartelak “hurrengo astean zehar” jarriko dituzte salgai
Klub bazkaria. Beste alde batetik, 50. urteurreneko klub bazkaria egingo dute ekainaren 10ean. Eta horretan parte hartuko dute klubeko taldeetako jokalariek, lantaldeek, bazkideek, hurreko pertsonek eta jarraitzaileek. Iragarri dutenez, bazkari horretarako txartelak datorren astean ipiniko dituzte salgai, baina oraindik ez dute zehaztu izen ematearen epemuga noiz izango den.
