Lea Artibaiko eta Busturialdeko Kooperatiben Mahaia Elkarteak antolatuta, Zientzia eta Teknologia Eguna egin zuten atzo, Astran, eta Busturialdeko DBH 4. mailako 325 ikasle batu zituzten bertan.
Zientzia eta Teknologia Eguna Astran. Ikusi, ukitu eta probatu. Hori da zientzia eta teknologia ulertzeko erarik onena, eta metodo hori praktikan jarri du Lea Artibaiko eta Busturialdeko Kooperatiben Mahaia Elkarteak, bigarren urtez Busturialdean. Atzoko Zientzia eta Teknologia Egunean, beraz, lortu zuten bilatzen zutena: gazteek inguruko enpresen lana eta teknologia ezagutzea.
Ikasteko beste modu bat jarri zuten praktikan: inguruko enpresek ematen dituzten aukerak eta erabiltzen dituzten teknologiak ezagutzekoa, ulertzekoa eta probatzekoa. Hala, ikastetxeko lau pareten artean ikasitakoa praktikan jarri zuten Astrako 13 tailer ezberdinetan. Horietan, Busturialdeko ikasleek robotika, materialak, adimen artifiziala, errealitate areagotua, elektronika, matematikak eta elektrizitatea bezalako gaiak landu zituzten, EHUko eta Kooperatiben Mahaia Elkarteko ikertzaile eta arlo ezberdinetako adituen laguntzagaz. Zientzia zein teknologia ikasgaiei “beldurra kentzeko” ekimena ere izan zen, ikasgeletan ikasitakoak balio duela ikusteko aukera.
Eskualdeko enpresen lana balioan jartzea zen ekimenaren asmoa, eta, horretarako, Lea-Artibai eta Busturialdeko enpresei buruzko ezagutza zabaldu zuten, industria zelakoa den erakutsiz eta etorkizunean bertoko enpresek beharko dituzten langileen profilak ezagutaraziz. “Helburua da gazteak eskualdeko enpresetara gerturatzea”, adierazi zuen Yanoba Mariezkurrena Lea Artibai Fundazioko teknikariak.
Talentatu programa. Talentua sortzea, mantentzea eta erakartzea da, beraz, proiektuaren asmoa. Hori da Talentatu programaren bidez Kooperatiben Mahaia Elkartea bultzatzen ari dena, eta atzoko ekimena proiektu horren parte da. Izan ere, Lea-Artibaiko Kooperatiben Mahaia Elkarteak, Leartibai Fundazioagaz elkarlanean, 2018-2019 ikasturtean jarri zuen martxan, STEAM ikasgaiak sustatu, eskualdea ezagutu, nortasun sentimendua landu, eskualdeko industria nolakoa den ikusi eta etorkizunean bertako enpresak berharko dituzten langile profilak ezagutzera emateko asmoz.
“Eskualdearen garapen ekonomikoa bultzatzeko lan egiten dugu guk, eta gure helburua da eskualdean lanpostua sortzea eta langileek bertan lan egiteko eta bizitzeko aukera izatea. Etorkizunera begira, gazte hauek izango dira etorkizuneko langileak, eta eskualdeko enpresek dituzten gabeziak eta premiak ikusarazi dizkiegu”, azaldu dute, eta, uste dute, bertoko enpresek behar duten talentua eskualdean sortuz gero, “tokikoaren alde” egiten ari direla.
