Bizkaiko Bertsolari Txapelketarako sailkapen fasea maiatzaren 4an hasiko dute
Udabarria Bertsotan fasean zortzi saio lehiatuko dituzte, eta horietako bi Muxikan eta Busturian izango dira. 48 bertsolarik parte hartuko dute, eta bi multzotan banatuta ariko dira. Busturialdeko hamahiru bertsolarik izena eman dute.
Argazkia: Bizkaiko Bertsozale Elkartea. Maiatzeko lau eguenetan jokatuko dute Udabarria Bertsotan, Bizkaiko Bertsolari Txapelketarako sailkapen fasea, eta bertan ariko dira Busturialdeko hamahiru pertsolari.
48 bertsolarik eman dute izena, eta bi multzotan banatuta ariko dira: A multzoa eta B multzoa. “Aipagarria da Bizkaiko eskualde guztietako partaideak egongo direla. Kopurua kontuan hartuta, zortzi saio egingo dira, sei bertsolarikoak”, azaldu dute. Hain zuzen ere, multzo bakoitzeko lau saio jokatuko dituzte, eta puntuazioz sailkatuko dira udazkenean lehiatuko duten Bizkaiko Bertsolari Txapelketara. Multzoko bakoitzetik gutxienez 13 bertsolarik egingo dute aurrera; Bizkaiko Bertsolari Txapelketako izen ematearen arabera ezarriko dute kopurua.
Maiatzaren 4an, 11n, 18an eta 25ean izango dira saioak, 18:30ean hasita; eguen bakoitzean bi saio egingo dituzte. Busturialdeak hartuko ditu horietako bi; maiatzaren 11n Muxikan lehiatuko dute saioa, eta maiatzaren 25ean, berriz, Busturian.
Sarrerak apirilean jarriko dira salgai www.bertsosarrerak.eus atarian. Bazkideek 2 euro ordaindu beharko dituzte, eta bazkide ez direnek 3 euro; 8 urtetik beherakoentzat, ostera, sarrera doakoa izango da. Saioaren egunean sarrerarik geratzen bada, txarteldegiak 18:00etan zabalduko dituztela aurreratu dute.
Bizkaiko Bertsolari Txapelketa. Urrian hasiko duten Bizkaiko Bertsolari Txapelketak sei kanporaketa, hiru finalaurreko eta finala izango ditu. Kanporaketetara 2018ko finalistak eta 2021ean finalaurrekoetan kantatu zuten bertsolariak sartuko dira. “36 bertsolarik parte hartuko dute fase horretan; 2018ko zenbat finalistak eta 2021eko zenbat final aurrekoetako bertsolarik izena ematen duten arabera”. Finalaurrekoetan 2021ean finalista izandakoak sartuko dira, eta finala abenduaren 16an izango da, Bilbao Arenan.
