Arraunlari Beteranoen Topaketa ospatzen ari dira gaur (martxoak 18), Bermeon. Mundakako Bisonteek irabazi dute Beteranoen IV. Bandera.
Arraunaren tradizioa eta balioak aldarrikatzeko antolatzen dute Arraunlari Beteranoen Topaketa, eta, iazko urrian Mundakan egin modura, jai giroan ospatzen ari dira gaur (martxoak 18), Bermeon.
Hamabi arraun klubetako kideak batu dira: Mundaka, Bilbao Arraunlari Beteranoak, Aizburua, Zumaia, Plentzia, Sestao, Iberia, Badok13, Santurtzi, Getxo, Fortuna eta Alacant.
Beteranoen IV. Banderaren lehiagaz hasi dute euren egun handia, eta Mundakako Bisonteak izan dira azkarrenak; 12 minutu, 9 segundo eta 86 ehuneneko denboragaz irabazi dute bandera. Mundakako taldeak lau segundo eta lau ehunen atera dizkio Alacant bigarren sailkatuari, eta bost segundo pasatxo Bilbo hirugarrenari.
Sestao izan da lehenengo txandako onena, eta haren atzetik amaitu dute Getxok, Badokek eta Aizburuak. Bigarren txandan uretaratu da talde mundakarra, eta lehen txandan Sestaok ziabogan markatutako denbora (6.04) hobetu du; 5 minutu eta 34 segundo markatu dute Mundakako Bisonteek ziabogan, eta horien marka ez du inork hobetu. Bigarren txandan, Bilbo sailkatu da Mundakaren atzetik, Santurtzi hirugarrena izan da eta Zumaia azkena. Plentziako, Iberiako, Alacanteko eta Fortunako traineruen artekoa izan da hirugarren txandako lehia, eta Alacant izan da azkarrena.
Mundakako Bisonteak estropada hasi aurretik
Gauera arteko egitaraua. Eguerdiko lehia amaituta, bazkalduta indarrak hartu ostean, esprint saioa lehiatuko dute, 17:00etatik aurrera.
19:30an, ostera, arraunlarien eta tiratzaileen arteko sokatira erronka izango da, Lameran. Gauerako, berriz, zuzeneko musika prestatu dute; Mikel Santiago idazleak gidatutako Deabruak taldeak kontzertua emango du, 23:00etatik aurrera, Lameran.
Beteranoen IV. Banderaren sailkapena:
- 1.- Mundaka: 12.09,86
- 2.- Alacant: 12.13,90
- 3.- Bilbao: 12.15,13
- 4.- Plentzia. 12.32,35
- 5.- Santurtzi: 12.48,12
- 6.- Fortuna: 13.25,27
- 7.- Zumaia: 13.38,82
- 8.- Iberia: 13.45,71
- 9.- Sestao: 13.57,93
- 10.- Getxo: 14.15,68
- 11.- Badok: 14.40,36
- 12.-Aizburua: 14.40,78
