Bertoko Azoka Txikia egin dute Ean
Bertoko Azoka Txikia egin dute, 11:30ean hasita, Eako Donibane-Arritola plazan. Inguruko ekoizleen tokiko produktuek hurreratutakoen arreta bereganatu dute. Ortuariak eta eztia nabarmendu dira.
Tokiko kontsumo arduratsua, ekologikoa eta jasangarria helburu dituen Bertoko Azoka Txikia egin dute gaur goizean, Ean. 11:30ean hasi dira Donibane-Arritola plazan jarritako postuetara hurreratzen lehendabiziko erosle nahiz kuxkuxeroak. Ordurako, prest eta zain zeuzkaten inguruko ekoizleak, beren produktu sorta ikusgarriagaz. Lurraren, abereen eta artisautzaren onenak topatu dituzte plazara bertaratu direnek.
Beraien produktuak plazaratzen lehendabizikoak Santana Esne eta Esnekiak eta bedarokela izan dira. Jogurtak, haragia eta deribatuak edota baserriko esnea eroan dituzte. Goizak aurrera egin ahala, herritar gehiago agertu dira azoka eremuan, eta giro bikaina nabarmendu da: hurrekoa eta atsegina. Hurreratu diren guztiek, gainera, azoka eremurako espresuki prestaturiko salda beroaz gozatu ahal izan dute. Lurbai ortuari ekologikoak postukoek, batik bat, aza, patatak, fruitu lehorrak, indabak eta kalabazak eroan dituzte. Horregaz batera, artisau erara eginiko larruzko produktuak ere egon dira.
Arreta deitu dute, era berean, Aberaska eztiak ta erlauntza produktuek. Era askotako ezti motak eroan dituzte, baina baita propoleoa edota ukenduak ere. Ukendu horiek azalarentzat “paregabeak” direla azaldu dute, eta propoleoak zein eztiak, aldiz, “birusen kontra laguntzen dutela”. Bertoko nahiz Arabako eztia eroan dute, zapore, jatorri, kolore eta dentsitate askotakoak denak ere.
Gaurko azokaz eta bertako giroaz gozatu dutenek, bestalde, datorren asteburuan ere pareko aldarteaz gozatzeko aukera paregabea edukiko dute. Martxoaren 4an, 11:00etan, Bedarokelako instalazioak eta bertako lan moldea ezagutarazteko bisita gidatua egingo dute, Bedarokelaren ustiategira bertara. Estreinako aldia izango da bisita gidatu hori egiten dutena; 653078518 telefono zenbakira deitzea gomendatu dute, izena emateko. Bisitan, ganadua landetara atera orduko, “non jaio, hazi eta bizi den”, ikusi ahalko da. Antolatzaileek “Mikel Iturraspe baserritarragaz ikasteko aukera” legez definitu dute. Parte hartzera animatzen direnek falda errea dastatu ahalko dute.
Ez hori bakarrik: bezperan, martxoaren 3an, Urtzako labatokian baserriko ogia egingo dute, eta biharamuneko bisita gidatuan 0 kilometroko artisau ogi hortaz ere gozatu ahalko dute. Antolakuntzatik egitasmo horretara ere animatzeko deialdia luzatu dute, herritarrek ogia modu tradizionalean zelan egiten den ezagutu dezaten.
