Gernika Gogoratuzen lana aitortu du Elxeko Udalak

Gernikak kontziliazioaren bidez "bakearen sinbolo bihurtzen jakin" duela azpimarratu du Elxeko Udalak. Maria Oianguren Gernika Gogoratuzeko zuzendariak gizarte demokratikoetan bizikidetza baketsua indartzen laguntzeko asmoa nabarmendu zuen.

Ane Maruri Aransolo

Gernika-Lumo

2022/12/21

Elxeko Udalak antolatu duten seigarren Giza Eskubideen Galan bakea oinarrizko giza eskubide modura aldarrikatzeaz gain, Gernika Gogoratuz Bakearen aldeko Ikerketa Zentroaren lana aitortu du; Amnistia Internazionalaren, Scout mugimenduaren eta Valentziako Nazioarteko Elkartasunaren lana ere balioan jarri du udalak.

Aurtengo gala Ukrainako gerraren eta munduko beste leku batzuetan dauden beste gatazka beliko batzuen ondoriozko bakeari buruzkoa izan da, eta Gernikak kontziliazioaren bidez “bakearen sinbolo bihurtzen jakin” duela azpimarratu dute.

Visit Gernika kanpainaren baitan egin dute giza eskubideen aldarrikapen unibertsala ospatzen duen ekitaldia aurten, eta, bertan, 1937ko bonbardaketaren izugarrikeriari eta haren ondorioei buruz hausnartu zuten. Gernikako biztanleen ausardiaz ere berba egin zuten, “adiskidetzean eta bakearen kulturan oinarritutako etorkizuna eraiki dutelako”.

Ekitaldian parte hartu zuen Maria Oianguren Gernika Gogoratuz Bakearen aldeko Ikerketa Zentroko zuzendariak, eta Elxeko Udalari eskerrak emateaz gain, belaunaldien arteko elkarrizketa bultzatzen jarraitzeko eta gizarte demokratikoetan bizikidetza baketsua indartzen laguntzeko asmoa nabarmendu zuen.

Mariola Galiana Elxek udaleko Garapenerako Lankidetzako zinegotziak Gernikako bonbardaketa gogorarazi eta bakerako eta kontziliaziorako eskubidea aldarrikatu zuen: “Giza eskubideen nazioarteko 1948ko abenduaren 10eko Parisko itunak jasotzen dituen printzipioen urraketa izugarriak oraindik ere gertatzen dira. Hori dela eta, indar handiagoz aldarrikatu behar dugu bertan jasotako eskubideen indarra eta defentsa”. Bakearen kultura eraikitzeko lanean jarraitzeko deia egin zuen, baita oinarrizko eskubideak “defendatuko eta sendotuko” dituen gizarte bat lortzeko deia egin ere.