Aurrerapauso handia eman dute
Lointek Gernika Bizkaiak 81-64 irabazi zion atzo [abenduak 4] Teneriferi emakumezkoen ligako 10. jardunaldian, Malosten.
Argazkia: Angel Grande. Lointek Gernika Bizkaia olatu onean sartuta dago, bost garaipen daramatza jarraian ligan. Gero eta gertuagoa du denboraldiko lehen helburua nagusia: Zaragozako Koparako txartela. Atzo [abenduak 4] 81-64 hartu zuen mendean Tenerife, Malosten.
Kontraste handiko astea izan da gernikarrentzat. Eguenean Perfumerias Avenidari irabaztetik (62-60) sailkapeneko azken sailkatuaren aurka jokatzera. Salamancako talde indartsuaren aurka bederatzi urtetan lortu duten bigarren garaipena izan zen. Oraindik sinetsi ezinik aurre egin behar izan zioten Kanariarrei. 8-14 aurreratu zen kanpoko taldea, eta Anna Montañanak hutsartea eskatu behar izan zuen bere jokalariak martxan jartzeko: 12-0eko partzialagaz erantzun zuten gernikarrek. Hala ere, defentsa egonkortzeko zailtasunak zituzten, Terezia Palenikovak min handia egin zuen bere barneraketekin. 21 tiro libre jaurti zituen Tenerifek atsedenaldia baino lehen, Lointek Gernika Bizkaiak bi bakarrik.
Argazkia: Angel Grande.
Partida osoan zehar bizkaitarrek hiruko marratik asko asmatu zuten, 17 saiakeratik hamar sartu zituzten. Spreaficok horietako hiru jarraian sartu zituen, guztira bost izan ziren, eta hirugarren laurdenean partida hautsi zuen 11-0eko partzialagaz, 59-45 aurreratu ziren. Tenerifek zonakako defentsak aldatuz, saiatu zen markagailuari buelta ematen, baina jokalarien nekea nabarikoa zen. Garaipena esku artean izanik, Montañanak Paule Loroño eta Olaia Arenas harrobiko jokalariak kantxaratu zituen, bigarrenaren debuta izan zen gorengo mailan.
Entrenatzaile valentziarra oso pozik agertu zen partidaren ostean: “Berriro ez gara nahi genuen bezala irten lehen minutuetan, baina gero partida ona osatu dugu. Garaipen garrantzitsua zen Kopako helbururako, eta astea borobiltzea lortu dugu”. Lointek Gernika Bizkaia sailkapeneko laugarren postuan dago, aurreko hirurekin berdinduta, zazpi garaipen eta hiru porrotegaz.
Eurocup eta liga. Beste aste gogor bat dute gernikarrek aurretik, eguenean [abenduak 8] Eurocup Womenen Reyer Veneziaren aurka lehiatuko dute Italian, eta zapatuan [abenduak 10] Valencia Basketen aurka, Fonteta pabilioian.
Argazkia: Angel Grande.
