Euskara izango da asteburuko protagonista nagusia Mundakan
Euskaraldiaren amaierako eta Euskararen Eguneko ekitaldiz beteko da Mundaka gaur eta bihar; 3-5 urte bitartekoek eman diete hasiera ospakizunei, Euskaraldiskoan dantza eginez.
3-5 urte bitarteko mundakarrak Euskaraldiskoan Mundakan euskararekin daukaten konpromisoa berresteko, hainbat ekimen antolatu dituzte Euskaraldiaren amaierako eta Euskararen Egunerako. Gaurkoan, herriko ume eta gaztetxoak izango dira protagonista nagusiak; beraientzako antolatu dituzte eguneko ekitaldi gehienak.
Horrela, 3-5 urte bitarteko umetxoek eman diete hasiera ospakizunei. 11:30etan agertu dira, irakasleen eskuetatik helduta, Alkate Mallona kirol-lekuan. Bertan, udalak Arima Cool Tourekin elkarlanean antolatu duen Euskaraldiskoa festa izan dute. Euskaraldiskoa, umeentzako diskoteka bat da, non euskal abestien erritmora dantzatu eta abesten duten.
Euskaraldiskoan Dj bat eta animatzaile bat izan dira. Animatzaileak, umeak dantza egitera energiaz animatu baditu ere, ez du esfortzu handirik egin behar izan, umeak izugarrizko gogoarekin agertu baitira, eta gehienak abestiak jarri orduko gorputza mugitzen aritu dira. Besteak beste, Paristik Natorren, Gora gora Betizu edota biribilketan dantzatzeko abestiekin mugitu dira. Irakasleek ere jarraitu dituzte koreografiak, eta dena ematen aritu dira diskofestak iraun duen ordu betean.
Ospakizunek eguerdi partean jarraituko dute. 14:50ean herritik zehar krosa egingo dute. Jarraian, aurtengo Euskaraldiko abestia, Esazu Hitz Bat, abestuko dute plazan; eta bukatzeko, Balkoitik Balkoira bertso saioa egingo dute plazan.
19:00tan, Euskaraldiko amaiera ekitaldian batuko dira mundakarrak. Amaiera ekitaldiaren baitan izango dira eskolako umeek abestutako bertsoak, Katillotxu Elkarteko gitarra taldearen eraskultaldia eta lehenengo Gabonetako Postal Lehiaketaren sari banaketa.
Biharko eguna Euskararen Eguna izanik, ekimen bi izango dira Mundakan; biak arratsaldez. 17:00tan Eidabe Antzerki Taldekoek Gora Bihotzak ikuskizuna antzeztuko dute, plazan. Ume eta gazteentzako antzerkia izango da, eta euria egin ezkero, Tribisarrospeko aterpean egingo da. 19:00tan, ekitaldiekin bukatzeko, Peio Ospital kantaldia egingo da Casinoan.
