Euskarazko Produktuen Katalogo berria paperean eta Interneten dago eskuragarri
1.400 katalogo eta 800 markatzaile banatuko dira Bermeon. Katalogoa Internet bidez eskuratzeko, www.KATALOGOA.eus web-orriaren bidez egongo da aukera.
Webgunearen portada. Argazkia: Euskal Produktuen Katalogoa. Euskarazko Produktuen Katalogoaren edizio berria paperean zein Interneten eskuratu daiteke. Aipatu katalogoak haur eta gazteei bideratutako ehundaka produktu batzen ditu paperezko edizioan, eta 7.400 produkturen erreferentziak Interneteko formatuan. Etengabe eguneratzen duten web orriak zein paperezko edizioak itxura berria estreinatu dute katalogoaren 24. edizio honetan.
Euskal Herriko udal eta mankomunitateetako 100 Euskara Zerbitzuk baino gehiagok osatu dute katalogoa elkarlanean.
Katalogoa bi ataletan banatuko da, eta atal bakoitzak bere azala izango du; atal batek 0-12 urte bitarteko haurrentzako produktuak batzen ditu, eta besteak 12-16 urte bitarteko gazteentzako produktuak. Katalogoa bi zatitan banatzeak adin tarte bakoitzari “nortasun propioa” ematen diola azpimarratu dute egileek; gainera, produktuen bilaketa izugarri errezten duela gogoratu dute.
Egunotan banatuko dira Araba, Bizkaia eta Gipuzkoan kaleratu dituzten paperezko 70.000 aleak.
www.katalogoa.eus maiztasunez eguneratzen den web-orria izanik, papereko alean agertzen diren produktuez gain, azkenengo produktuak ere eskaintzen ditu, deskatalogatutakoak katalogotik aterata. Webgunea, paperezko edizioan bezala, bi ataletan dago bananduta. Atal bakoitzak bere direktorioa dauka eta, hartara, tipologia bakoitzeko produktuen bilaketa “nabarmen errazten eta hobetzen” da produktuak tituluaren, argitaletxearen, autorearen, adin-tartearen edota prezioaren arabera bistara daitezkeelako.
Azken nobedadeak jaso nahi dituenarentzat, buletin elektronikora harpidetzeko bidea ere eskaintzen du web-orriak. Hauek, urtearen buruan 10 buletin jasoko dituzte, argitaratu berri diren produktuen erreferentziekin.
Katalogoak Bermeon.
Umeak eta gazteak dituzten Bermeoko familiek ikastetxeen bitartez jasoko dute katalogoa. Gainera, denda hauetan ere eskuratu ahalko da: Luma, Kuku-enea, Udane eta AUE. Eta beste aldetik, udal zerbitzuetan (Liburutegia, Kultur Etxea, Musika Eskola…). Guztira, 1.400 katalogo eta 800 markatzaile banatuko dituzte Bermeon.
