Amaia Aberasturik aktore onenaren kategorian lehiatuko du Almerian
Almeriako nazioarteko zine jaialdia ospatuko da azaroaren 18tik 27ra bitartean, eta Amaia Aberasturik aktore onenaren izendapena jaso du drama kategorian.
Azaroaren 18tik 27ra bitartean ospatuko da Almeriako Nazioarteko Zine jaialdia, eta Amaia Aberasturik aktore onenaren izendapena jaso du drama kategorian, La edad de la ira seriean egindako lanagatik.
Gautegiz Arteagako aktoreagaz batera, Adriana Ugarte (Heridas), Maria Leon (Heridas), Nerea Barros (La novia gitana) eta Nathalie Poza (La Unidad) lehiatuko dira drama kategoriako aktore onenaren arloan.
La edad de la ira Atresplayerrek ekoitzitako lau ataleko miniseriea da, Nando Lopezen izen bereko eleberrian oinarritutakoa. Jakinarazi dutenez, liburua nerabeei zuzendutakoa da, eta klasiko garaikide bihurtu da institutu askotan. Telesailak, berriz, Marcosen (Manu Rios) istorioa kontatzen du, aita indarkeriaz hiltzen duen institutuko mutilaren egunerokoa.
Kategoria horretan izendapena jaso duten gizonezko aktoreak hurrengo hauek dira: Juan Echanove (Desaparecidos), Jose Coronado (Entrevias), Luis Zahera (Entrevias), Alex Monner (La ruta) eta Javier Camara (Rapa) dira.
Eta, drama kategoriako serie onenen artean daude, berriz, Entrevias (T1), Heridas (T1), La novia gitana (T1), La Unidad (T2) eta Rapa (T1).
Hain zuzen ere, hemeretzi lan lehiatuko dira jaialdian, 13 kategoriatan banatuta, eta bi kategoria berri izango dituzte: minisailaren sortzailea eta publikoaren saria.
