Gernikesa Txirrindulari Elkartearen urteroko zita, bihar
Elkarte Eguna ospatuko dute bihar Gernikesa Txirrindulari Elkarteko partaideek. Talde argazkia, txirrindulari irteera eta elkartekideen bazkaria egingo dituzte.
Gernikesa Txirrindulari Elkarteak goizetik arratsaldera bitarteko egitaraua prestatu du biharko: Elkarte Eguna ospatuko dute. Urtero-urtero egiten dute egitasmo hori, errepideko txirrindulari denboraldiaren bukaera aldean, urrian. Aurten, 09:15ean ipiniko dute abian elkartekideek klubaren eguna: Lorategietan elkartuko dira guztiak, talde argazkia ateratzeko. Ondoren, 09:30ak inguruan, ibilbide zikloturista egingo dute; antolakuntzatik ohartarazi dute txirrindularitza irteera ez-lehiakorra izango dela, hau da, ez dela lasterketa izango.
Ziklistak Olesko auzotik aterako dira eta Laida nahiz Lagara bidea egingo dute; bertatik, Natxitura eta Eara joango dira, eguneko lehendabiziko mendatea, Bedarona, igotzeko. Jarraian, Ispastertik Lekeitiora joko dute, eta handik, ostera, Munitibarrera. Amaitzeko, Gernika-Lumora bueltatuko dira. 14:3oean, aldiz, elkartekideen eta senideen urteroko bazkaria egingo dute, Nabarniz jatetxean. Gernikesa Txirrindulari Elkartekoek txirrindularitzaz eta giro atseginaz gozatu gura duten guztiei egun osoko egitarauan parte hartzeko gonbita luzatu die.
