Adinekoen Eguna ospatuko dute Busturian eta Muruetan
Busturiko adinekoek zinema saioa, txokolatada eta bazkaria izango dituzte aukeran; muruetarrek, berriz, merienda jateko batuko dira domekan.
Adineko Pertsonen Nazioarteko Eguna da urriak 1, eta Busturiko eta Muruetako udalek jarduera desberdinak antolatu dituzte adinekoei zuzenduta.
Busturian, barikuan (irailak 30), adineko pertsonei bereziki zuzendutako zinema saioa eskainiko dute Altamirako kultur Etxean. 19:00etan hasiko da emanaldia, eta horren ostean bertaratukoentzako txokolatada egongo da. Domekan (urriak 2), berriz, herriko nagusiak batu aldera, kamiñoko jatetxean batuko dira elkarrekin bazkaltzeko, 15:00etan. Irailaren 26ra arteko aukera izan dute izena emateko.
Muruetan, berriz, herriko adinekoei zuzendutako merienda antolatu dute domekarako (urriak 2); 19:00etan batuko dira Herriko Tabernan. Lore Etxea jubilatuen elkarteak antolatu du merienda, Muruetako Udalaren laguntzagaz.
