Metcalfek ezustekoa eman du Miribillan
Kerman Lejarragak ezin izan du James Metcalf britainiarraren kontrako borroka irabazi, eta, beraz, Liverpoolekoa WBAko superwelter kontinental mailako txapeldun izendatu da.
Argazkia: Kerman Lejarraga James Metcalfek Miribilla mutu utzi zuen barikuan: Pronostikoen kontra, Kerman Lejarraga Morgako Errebolberra mendean hartu eta WBAko superwelter kontinental titulua irabazi zuen britainiarrak. Hasieratik borroka orekatua izan arren, amaieran ez zen zalantzarik izan, eta Metcalfek 97-94, 96-94 eta 96-95 irabazi zion morgatarrari. Liverpoolekoaren garaipenak hautsak harrotu ditu Bilbon, Lejarragaren bizilekuan: bisitaria izanda eta, ustez, Lejarraga hautagai nagusiaren gerizpean borrokatuta, balentria handia egin zuen Erresuma Batukoak. Borrokaldian zehar, ez zen dominatzaile argirik egon, eta, horrenbestez, ñabardura txikiek egin zituzten aldeak.
Borrokaren hasieratik, bi boxeolariek distantziak doi-doi neurtu zituzten, bakoitzak zeukan arriskuaren jakitun. Lejarragak jab kolpeetan oinarritu zituen bere erasoaldiak, eta teknika berberagaz erantzun zion Metcalfek; hain zuzen ere, momentu jakin batzuetan britainiarrak apur bat gehiago izatearen antza erakutsi zuen. Round bakoitzean, berdinketa usaina izan zen nagusi. Morgako errebolberra Metcalf baino gehiago izan zen defentsa lanetan: kolpe gutxiago enkajatu behar izan zituen, bere burua hobeto babestu zuelako. Horrek guztiorrek higadurazko borrokaldia izatea ekarri zuen. Une batez, Lejarragak kolpe ugari kateatu ahal izan zituen segidan, eta borroka iraultzeko saiakera egin zuen, baina ez zen nahikoa izan.
Bi boxeolarietako bat ere ez zen nabarmendu borrokan. Berdintasun eta parekidetasun hori tarteko, epaileek puntukako garaipena Metcalfi eman zioten, eta WBAko superwelter kontinental mailako txapeldun izendatu zen Bilbon. Porrotak, aldiz, asko mingostu dio munduko txapelketaren ametsa Lejarraga morgatarrari.
