Sanisidroak ospatzeko prest daude herritarrak
San Isidro jaien baitan, denetariko ekintzak antolatu dituzte astebururako.
Nekazarien zaindariari keinu egingo diote datozen egunetan, Busturialdeko zenbait herritan. Izan ere, San Isidro jaien baitan, denetariko ekintzak antolatu dituzte astebururako.
Ajangizen, esate baterako, gazteen eta afizionatu mailako pilotarien partiduak izan dituzte, sanisidroetarako beroketa modura. Bihar, aldiz, jai nagusiei hasiera ofiziala emango diete, eta, ohiturari jarraituz, Saragiaren igoera egingo dute, oinez. Ekintza horregaz aldarrikatu ohi dute ajangiztarrek Errenteria auzoa Ajangizko parte dela.
Zapatuan, jai giroa herriko plazara eroango dute: 20:00etatik aurrera, Pertxamendi txokoan mus txapelketa egingo dute, eta, jarraian, plazan sardina jana egongo da. San Isidro Egunean, domekan, hamaiketako herrikoia egongo da, hori ere plazan, 13:00etan hasita.
Muruetan ere ospatu ohi dituzte sanisidroak. Aurten, zapatuan hasiko dituzte ospakizunak, poteoagaz eta bazkari herrikoiagaz. Arratsalderako, denetariko jarduerak antolatu dituzte, hala nola, Giorgi Rodri magoaren ikuskizuna eta briska lehiaketa.
San Isidro Egunean, ostera, mezagaz hasiko dute eguna, eta, ondoren, San Isidro kofradikoen hamaiketakoa egongo da. 13:00etako bingo eta bola jokoen ostean, umeen jolasak izango dituzte arratsaldean, 16:30etik aurrera. 19:00etan, Angel Txertudik eta Juan Uriartek indarrak neurtuko dituzte zaldi probetan, eta, amaitzeko, 20:00etan, San Isidro jaiei agurra egingo diete, txokolate janagaz.
Natxitun ere ospakizun usaina izango du asteburuak. 24. San Isidro Sari Nagusia txirrindulari probagaz hasi zuten festa, Natxituko Jai Batzordeak antolatuta eta Eako Udalaren laguntzagaz. Domekan, jaiak jarraipena edukiko du: trikiti soinuz alaituko dituzte kaleak, 12:30etik aurrera. 14:30ean, ostera, herri bazkaria egingo dute, eta antolatzaileek aurreratu dute bolatokia ere zabalik egongo dela.
Kortezubi ere jai soinekoz jantziko dira. Izan ere, meza egongo da domekan, 10:30ean. Jarraian hamaiketakoa egingo dute.
Herritarrei deialdia. Sanisidroak ospatzeko deia luzatzeaz gain, Kortezubiko Udalak herritarrei jakinarazi die santiagoak antolatzeko bilera egingo dutela; gaur 19:00etarako jarri dute hitzordua, udaletxeko udalbatzar aretoan.
