Arrizabalaga eta Aldai, kaiolan elkarren kontra
Olatz Arrizabalagak eta Amaia Aldaik jokatuko dute domekan [maiatzak 8] 17:00etan VII. Master 4 1/2ko finala.
Olatz Arrizabalaga eta Amaia Aldai emakumeen arteko azken urteetako izar nagusietako bi dira, eta berriro egingo dute topo elkar final batean. Apirilaren 23an bikoteko Bizkaia Torneoan jokatu zuten elkarren aurka eta gernikarrak lortu zuen garaipena Naroa Agirregaz batera Aldai eta Nora Mendizabalen aurka: 22-11.
Domekan [maiatzak 8] 17:00etatik aurrera, berriz, bakarka arituko dira kaiolan, hau da, 4 1/2aren barruan. Ez dute biek ala biek Zornotzako VII. Master kaiolan bide erraza izan. Arrizabalagak lehen partidan Oses oñatiarrari nagusitasunez, 22-4, irabazi bazion ere, finalaurrekoetan lan gehiago izan zituen. Leire Garairen aurka gogotik egin behar izan zuen lan Gernika-Lumokoak, 7-2 aurreratu bazen ere, 2-9ko partziala jaso zuen. Partidako bigarren zatian bere indarra erakutsi zuen eta azkenean finalerako txartela lortu zuen 22 eta 18ko emaitzagaz.
Amaia Aldaik ere aurkari gogorra aurkitu zuen Miren Larrarterengan. Lea- Ibarra taldekoa jokoan nagusi zen, baina Larrarteri bizia eman zion hainbeste huts egiterekin; gauzak horrela, Larrartek partida bere jokora eramatea lortu zuen, hau da, gogortasunera eta iraupenera. Azken tantoetan Aldaik bere nagusitauna berretsi zuen, eta 22-17 nagusitu zitzaion, 11-14 galtzen joan ostean. Beraz Lea Ibarra Motrollo taldeko pilotarien arteko finala izango da Zornotzakoa.
