Binakako txapela begiz jota
Olatz Arrizabalaga gernikarrak Master Laboral Kutxako binakako txapelketako finala jokatuko dute domekan [martxoak 27]. Enara Gaminde laukiztarragaz Amaia Aldai dimoztarraren eta kontra Andrea Capellan errioxarraren kontra lehiatuko da Irungo Uranzu pilotalekuan. Euskal Telebistak zuzenean emango du, 12:00etatik aurrera.
Argazkia: Emakume Master Cup. Final handirako atzera kontaketa hasi dute. Binakako Txapelketako pilota mistoko elite mailako finala domekan [martxoak 27] jokatuko dute 12:00etan hasita, Irungo Uranzu frontoian. Kantxa barruan ikuskizunak erabatekoa izateko osagai guztiak ditu, zalantza barik, txapelketako bi bikoterik onenak heldu direlako, Olatz Arrizabalaga-Enara Gaminde eta Amaia Aldai-Andrea Capellan.
Aurrekoetan modura, Irunen egoterik ez duten pilotazaleentzat ETB-1k zuzenean eskainiko du jaialdia eta www.eitb.eus ataritik ere ikusi ahal izango da.
Bi bikoteek antzerako izaera dute, esperientzia eta maila handiko bi aurrelari ausart eta alboan, beheragotik indar handiz heldu diren bi atzelari gazte. Arrizabalaga Gernika-Lumoko aurrelariak bere binakako hirugarren finala jokatuko du, eta bi atzelarientzat, berriz, lehenengoa da aurtengoa, beraz, presioari aurre egiteko duten gaitasunak zeresan handia izan dezake finalean.
Maila handiko final irekia espero da, lau finalistek pilotan asko jokatzen dutela erakutsi baitute orain arteko bederatzi jardunaldietan. Finaleko partidak berak aurrekari bat ere izan zuen, Astelena bezalako pilotaleku historiko batean. Hain zuzen ere, txapelketaren 1. jardunaldian lehia ikusgarria izan zuten finaleko bi bikoteek; Arrizabalaga eta Gaminde 22 eta 16 nagusitu zitzaizkien Aldairi eta Capellani otsailak 6an.
Hautagai nagusiak izatearen presioari aurre egin beharko diete Arrizabalagak eta Gamindek. “Itxaropentsu eta gogotsu” dago aurrelari gernikarra, aurtengo helburua binakako txapela janztea da, “aurretik daukan arantza” kentzea, eta txapelketan erakutsitako joko onagaz segitzea da erronka. Gaminde eta bera maila oso altuan dabiltza denboraldi hasieratik, eta, gainera, urte osoan elkarregaz entrenatzeko aukera izan dute, eta horrek mesede egin die.
Kantxa barruko parekotasunagatik ez ezik, bikaina izateko osagai guztiak izango ditu Master Laboral Kutxako Irungo domekako finalak. Irungo Uranzu pilotalekua plaza berezia da Emakume Master Cup zirkuitoaren barruan, bertan jokatu dituzte binakakoaren azken bi finalak, baina oraingoa berezia izango da, azkenengo bi urteetan pandemiak eragindako osasun neurriek galarazi ondoren, aurtengo Binakako Txapelketako pilota mistoko elite mailako finalak frontoiko harmailak jendez gainezka jokatuko baitituzte.
“Urtez urte, eta arazoak arazo, Irungo Udalak esfortzu handia egin du emakumeen esku pilotarik onena euren herrira ekartzeko eta azkenean, aurten festa erabatekoa izango da, pilotazaleen berotasunak beti ematen diolako beste puntu bat ikuskizunari”, esan dute Emakume Master Cupeko arduradunek.
Final handiaren aurkezpenean, Borja Olazabal Irungo kirol zinegotziak, Goizane Alvarez Gipuzkoako Kirol Zuzendariak eta Iñaki Elortegi Laboral Kutxako Irungo bulegoko zuzendariak domekan Uranzura gerturatzeko deia egin diete pilotazale guztiei, “ikuskizuna eta festa giroa handiak izango dira eta”.
Argazkia: Emakume Master Cup.
Bizkaia Torneoa. Bestalde, domekako finalaren aurretik, Emakumezkoen IV. Bizkaia Esku Pilota Txapelketaren 2. jardunaldia lehiatuko du pilotari gernikarrak, barikuan (martxoak 25).
Arrizabalaga Naroa Agirregaz bikotea osatuta ari da, eta ondo hasi dute txapelketa; izan ere, aurreko barikuko (martxoak 18) 1. jardunaldian Larrarteri eta Osesi 22-14 irabazi zieten. Bilboko partidu horren ostean, Arrizabalagaren eta Agirreren hurrengo geltokia Zallako Mimetiz frontoia izango da; Leire Garairen eta Enara Gaminderen kontra jokatuko dute.
Aurrelari gernikarrak adierazi du ez duela pilotaleku horren inguruko erreferentzia gehiegi, bertan behin jokatu duelako bakarrik: “Baten baino ez naiz aritu Mimetizen, eta pilota goxuagaz izan zen; maila honetan ibiltzea, beraz, bestelakoa izango da. Dena dela, pozarren nago herri berriak tankera honetako txapelketetara gehitzeaz, zaletasuna eremu berrietara zabaltzeko bidea hori baita”. Jokatzea suertatuko zaien pilotalekua ez ezagutzeak Garairen eta Gaminderen kontrako partidua baldintzatu dezakeela uste du: “Ondo ezagutzen ez den pilotaleku batean jokatzeak ardura puntutxo bat sortzen du beti, baita urduritasun apur bat ere; nolanahi ere, jakin badakigu bai txapelketako finalaurrekoak, bai final handia Bilboko Bizkaia frontoian izango direla”.
Argazkia: Emakume Master Cup.
Orain arteko “sentsazio bilaketa bikainagaz jarraitzea” izango da Arrizabalagaren eta Agirreren helburua Zallako norgehiagokan: “Gure jokoari eta elkar ulertzeko moduari eustea bilatuko dugu, eta, jakina, kosta ala kosta garaipena lortzea”. Garaipenak, hain zuzen ere, prezio altua izango du, aurrelari gernikarrak azaldu duenez: “Garai eta Gaminde sasoi onean dauden pilotariak dira; esate baterako, Gaminde, bere 14 urteekin, egun dagoen atzelaririk onenetakoa da, eta gure jokoa jagon beharko dugu atzean, aurrean aukerak sortzeko”.
Elkar ondo ezagutzen eta ulertzen dira Arrizabalaga eta Agirre: “Ondo ezagutzen dudan jokalaria da, maiz jokatu baitugu elkarregaz; gu bion jokoak bikain uztartzen dira, eta kantxaren atzealdean lan handia egiten duela uste dut, nik aurrealdean tantoak errematatu ahal izateko”. Joko molde horri ekin zioten barikuko partiduan, baina “lan gogorrak” izan zituzten Larrarte eta Oses menperatzeko, “ez zen partidu erraza izan”. Larrarte-Oses bikotea “oso zuzen” azaldu zen frontoira; hasieratik maila altua agertuta, 10-2 aurreratu ziren. “Puntu horretara arte, partiduan gu baino gehiago izan ziren, baina hortik aurrera egoerari buelta ematea lortu genuen, gure jokoa egiteko”.
Arrizabalagarentzat lehiaketa sobera ezaguna da Bizkaia Torneoa: parte hartzen duen laugarren aldia da aurtengoa, eta, horrenbestez, orain arteko guztietan egon da Gernika-Lumoko aurrelaria. Txapelketa irabazteko hautagaiak direla uste du, baina, era berean, argi dauka lehiakortasuna mailarik gorenekoa izango dela: “Naroa eta biok ondo heldu gara ligaxka hasierara, eta, hortaz, esango nuke hautagai izatearen ardura daukagula; hori bai, Garaik eta Gamindek osatutako bikoteak lanak zailduko dizkigula uste dut, maila altuan daude eta”.
