Busturialdeko bertsolari txapelketak baditu zortzi finalistak
Zuzenean sailkatu dira Mikel Retolaza, Aitor Etxebarriazarraga eta Onintza Enbeita. Puntuazioaren arabera, berriz, Koldo Gezuragak, Asier Galarzak, Ibai Amillategik, Beñat Bilbaok eta Lurdes Ondarok lortu dute finalerako txartela.
Busturialdeko Bertsolari Txapelketaren finalerako pasea zuten jokoan barikuan Muxikako Ariatza txokoan. Onintza Enbeita, Koldo Gezuraga, Asier Galarza, Ibai Amillategi, Iker Uriarte eta Jokin Ansotegi ziren protagonista nagusiak, eta bikain aritu ziren. Sei bertsolari horietatik lauk eskuratu zuten martxoaren 5ean, 19:00etan Astran lehiatuko den finalerako txartela.
Euren saioak irabazita, zuzenean sailkatu ziren Mikel Retolaza, Aitor Etxebarriazarraga eta Onintza Enbeita. Puntuazioaren arabera, berriz, Gezuragak, Galarzak, Amillategik, Beñat Bilbaok eta Lurdes Ondarok lortu dute sailkapena.
Nor bere onena ematen saiatu zen Ariatzan, eta egindako ahaleginak emaitza onak izan zituen sei bertsolarientzat. 175,5 puntu batu zituen Enbeitak, hirugarren eta azken kanporaketa irabaziz. Bere atzetik sailkatu zen Gezuraga 164 puntugaz, eta gertutik jarraitu zion Galarzak, bigarren postutik puntu erdira geratu baitzen; 163,5 puntu bildu zituen muxikarrak. Laugarrena izan zen Amillategi, 161,5 puntugaz. Uriartek 150,5 batu zituen, eta Jokin Ansotegik, berriz, 128 eskuratu zituen bere eskualdeko lehen txapelketan.
Atxelipe txokoan lehiatzekoa zen saioa eskolan jokatu zuten azkenean, izan ere, 70 bertsozaletik gora bertaratu ziren. “Giro itzela” egon zela azpimarratu dute antolatzaileek.
Sailkapen orokorra
1.Onintza Enbeita: 175,5 (Hirugarren saioa irabazita, finalean dago)
2. Aitor Etxebarriazarraga: 172,5 (Bigarren saioa irabazita, finalean dago)
3. Mikel Retolaza: 166,5 (Lehenengo saioa irabazita, finalean dago)
4. Koldo Gezuraga: 164 puntu
5. Asier Galarza: 163,5
6. Ibai Amillategi: 161,5
7. Beñat Bilbao: 159
8. Lurdes Ondaro: 155
9. Enare Muniategi: 155
10. Koldo Muñiz: 154
11. Ander Elortegi: 152
12. Julen Ibarguengoitia: 150,5
13. Xabier Enbeita: 150,5
14. Eneko Aldana: 150,5
15. Iker Uriarte: 150,5
16. Janire Arrizabalaga: 146
17. Nagore Beitia: 143
17. Jokin Ansotegi: 128
