Basurdeak esperotako garaipenik barik bueltatu dira Valladolidetik
Ohorezko Mailako 11. jardunaldian, Grupo Intxausti Gernika Rugby Taldeak 18 eta 10 galdu zuen VRAC Quesos Entrepinaresen kontra zapatu arratsaldean [urtarrilak 29]. Hasieratik amaierara partidu oso lehiatua izan zen.
Eneko Gorostiza Gernika RTko jokalariak esan bezala, bigarren zatian lortutako puntuak ez ziren nahikoa izan, eta esku hutsik bueltatu behar izan zuten Gernika-Lumora. Hain zuzen ere, 11 eta 0eko markagailuagaz amaitu zuten lehenengo zatia.
Gorostizaren hitzetan, “partidu nahikoa parekatua” izan zen. Eduardo Maidagan Gernika RTren entrenatzaileak dio partidu “ona” izan zela eta jokalariek “dena eman” zutela: “Hasieratik amaierara partiduan sartuta aritzeko asmoz zelairatu ginen. Partidu ona izan zen, jokalariek dena eman zuten zelaian, baina, beste behin, hutsegite puntualengatik galdu genuen”.
🎙️🗣️ Eneko Gorostizaren adierazpenak VRAC Quesos Entrepinares-en (@VRAC) aurkako partiduaren ostean.#GeratzekoGatoz
— Gernika Rugby Taldea (@GernikaRT) January 29, 2022
🐗💪🏼 pic.twitter.com/XoAV9dTnxx
Beste urte batzuetan ez bezala, Valladolideko taldea ez dago ligako onenen artean. Sailkapeneko bederatzigarrena da, eta gernikarrak Pepe Rojon garaipena eskuratzeko itxaropena zeukan. “Maila jaitsiera saihesteko helburu hori lortzeko bidean, garaipena lortu, eta aukerak edukiko genituela uste genuen. Behekaldean dagoen taldea bada ere, VRAC etxean oso indartsua da. Partidu konplikatua izan zen, Pepe Rojon jokatzen ditugun denen modukoa”, azaldu du entrenatzaile gernikarrak.
Datozen bi asteburuetan ez dute ligako partidurik jokatuko. Hurrengo jardunaldian euskal derbia hartuko du Urbietak. Ampo Ordizia REren kontra denboraldiko ligako bigarren garaipena lortzeko asmoz ariko dira etxekoak.
Bost partidu, bost final geratzen zaizkiela gogoratu du Maidaganek: “Aukerak badaude, baina gerra edo borroka honetan bala gehiegi galtzen ari gara. Gure esku dago dena”.
7 puntugaz azkenengo postuan dago talde gernikarra. Bi puntura dauka CR La Vila. Gainontzeko klubekin tarte handiagoa daukate. VRAC bederatzigarrenak 19 puntu ditu eta Universidad de Burgos hamargarrenak 17 puntu ditu.
