Txistu doinuekin girotu dute San Anton eguna
Kankinkabara Txistu Taldekoek kalejira egin zuten iluntzean; bisigu bat ere jaso zuten Portuzarrean.
Kankinkabara Txistu Taldeko txistulariek mahoiak eta txapelak soinean jantzi eta kalera atera ziren atzo iluntzean; San Anton eguna baitzen. Hala, Lamerako Andeko tabernan hasi eta Portuzarrera abiatu ziren kalejiran.
Urtero legez, Arrantzaleak esnatzen eta Gregorio Solabarrieta bermeotarraren Kresaletan piezak jo zituzten. Garai bateko ohitura berreskuratzeko lana egin dute Bermeoko txistulariek; izan ere, garai batean txistulariek agurtzen zituzten arrantzaleak portutik bertatik, eta haiek itzultzean modu berean ematen zieten ongietorria, bisiguak botatzen zizkieten, gainera.
Atzo ere bisigurik ez zen falta, txalupa batetik jaso zuten txistulariek bisigu bat. Ondoren, Andeko tabernan batu ziren afaltzeko.
