Aurten, ikasleek herriko hainbat gune aztertu dituzte eta diagnostikoa egin dute. Bideo bat aurkeztu dute gaur goizean egin duten foroan.
Eskola Agenda 2030 proiektuaren baitan, Bermeoko ikastetxeetako (San Frantzisko Herri Ikastetxea, Ignacio Arozena-Benito Barrueta B.H.I., Sagrado Corazon Ikastetxea eta Eleizalde Ikastola) zenbait ikasle udal ordezkariekin batu dira gaur goizean Gizarte eta Kultura Etxean. Udal foroa egiteko batu dira, hain zuzen ere.
Argazkia: Bermeoko Udala
Aurten, ikasleek herriko hainbat gune aztertu dituzte eta diagnostikoa egin dute. Behin egoera ikusita, euren eskubide eta betebeharrak zeintzuk diren definitu dituzte. Lanketa horrekin bideo bat egin dute, eta bideo hori ikusteko aukera izan dute gaurkoan udal ordezkariek eta teknikariek.
Aipatu bideoan, Bermeoko hainbat parke eta gune agertzen dira, eta ikasleek horien egungo egoera zein den aztertu dute. Toki hauetako batzuetan lirdinga, zikinkeria, pintadak… daudela sumatu dute. Hala, ikasleek foroan azaldu dutenez, euren eskubidea da “gune hauek behar bezala eta garbi egotea” eurek erabili ahal izateko. Hala ere, ez dira horretan bakarrik geratu, eta euren erantzukizunen berri ere eman dute. “Gure betebeharra da gune hauek behar bezala zaintzea, ez zikintzea eta pintadarik ez egitea. Hori gure esku dago”, azaldu dute.
Bideoaren ostean, udal ordezkariekin iritzi desberdinak elkartrukatzeko aukera izan dute.
