Kortezubiko frontoia eta probalekua zabaldu dituzte
Pandemiaren aurreko baldintzetan zabalduko dituzte frontoia eta probalekua. Kortezubin erroldatutakoen txartelak automatikoki aktibatuko dira.
Kortezubiko frontoia eta probalekua zabalik daude, pandemiaren aurreko baldintzetan. Hala, Kortezubin erroldatutakoak 08:00etatik 22:00etara erabili ahalko dituzte.
Udalak zehaztu du herrian erroldatutakoen txartelak automatikoki aktibatuko direla; arazoren bat sortuz gero, udalarekin harremanetan jartzea eskatu dute.
Frontoia eta probalekua astelehenetik barikura 19:00etatik 22:00etara erreserbatu ahalko dira. Probalekua jardueraren arabera erreserbatuko da, bakoitza prezio batekin. Herri kirolak egiteko 3 euro, asto eta zaldiek entrenatzeko 6 euro, eta idiekin aritzeko, berriz, 10 euro. Pilotalekua ere erabili ahalko da, eta hori erreserbatzeko bi euroko prezioa jarri dute.
Jakinarazi dutenez, ekintzak burutzerakoan errespetatu egin beharko dira osasun agintariek COVID-19a prebenitzeko ezarritako segurtasun eta higiene neurriak, bereziki maskara erabiltzearen eta gutxienez metro eta erdiko segurtasun distantzia mantentzeari buruzkoak.
