Euskal Kopa, denboraldiko lehen txapelketa
Lointek Gernika Bizkaiak Euskal Kopa lehiatuz hasiko du denboraldia. Barikuan Araskiren kontra jokatuko du eta domekan IDKren kontra.
Lointekekoak iazko kopa ospatzen. Argazkia: Euskal Saskibaloi Federazioa. Titulua berresteko aukera dauka Lointek Gernika Bizkaiak. Iaz Gernika-Lumora ekarri zuten Euskal Kopa, eta asteburuan, irailaren 3tik 5era lehiatuko dute aurtengoa, Durangoko Landakon.
Hiruko kopa da 2021ekoa. Aurrekoetan finalerdiak eta finala jokatu izan badituzte ere, oraingo honetan, Emakumezkoen Ligaren hiru euskal taldeak bakarrik ariko dira lehian. Lointek Gernika Bizkaiak Araskiren kontra jokatuko du barikuan (irailak 3), 18:00etatik aurrera, eta domekan (irailak 5), ordu berean hasiko da talde gernikarraren eta IDKren arteko partidua.
2021-2022 denboraldirako 11 jokalariz osatu dute taldea. Belen Arrojo, Roso Buch, Itziar Ariztimuño, Margaret Roundtree, Paula Ginzo, Angie Bjorklund eta Marta Alberdik kontratuta berritu dute, eta Melisa Brcaninovic, Roselis Silva, Tinara Moore eta Gabija Meskonyte fitxatu dituzte.
Fisikoki oso ondo ailegatuko da taldea denboraldi honetako lehenengo hitzordu honetara. Baina, bi hutsunegaz ariko dira Durangon. Bi jokalari min hartuta daude, eta apurka-apurka errekuperazio lanak egiten ari dira. Buch katalanari orkatilean ebakuntza egin zioten ekainaren amaieran, eta Meskonyte lituaniarrari lotailu gurutzatutik urtarrilean. Taldean lanean ari badira ere, ez daude jokatzeko moduan, baina datozen lagunartekoetan jokatzea aurreikusten dute.
Sarrerak. 2020-2021 denboraldian harmailetan marea granatearen bultzadarik barik aritu ziren jokalariak, eta zaleak bueltatzeko gogoz daude. Horietako batzuek Euskal Kopan daukate aukera.
Euskal Federazioak sarrera kopuru mugatu bat jarri du talde bakoitzarentzako. Sarrerak doakoak dira eta bihar (irailak 2) 12:00ak baino lehen sarrera eskaera osatzen duten Lointek Gernika Bizkaiako bazkideen artean banatuko dituzte klubari dagozkionak. Eskaerak sarrera kopurua baino gehiago izanez gero, zozketa egingo dutela jakitera eman dute, eta eskaera osatuko duten bazkide bakoitzari esango diote sarrera izango duen ala ez. Bazkideek klubaren webgunean daukate sarrerak eskatzeko inprimakia eta aplikazioaren bitartez ere eskatu daitezke.
