Ekainaren 4ra arte izena eman ahalko da Gautegiz Arteagako udalekuetan
Hamabost eguneko bi txandatan banatu dituzte udalekuak, 10:00etatik 14:00etara bitartean. Udalekuak ingurune "hurbil eta seguru batean" antolatu dituzte, eta euskal kultura izango dute ardatz.
Udalerriko gaztetxoentzat jardueraz beteriko Udalekuak 2021 programa prestatu du Gautegiz Arteagako Udalak. Osasun egoera dela eta, 3 eta 12 urte bitarteko ume eta gazteentzako udalekuak dira antolatutakoak, eta zehaztu dutenez lekuak mugatuak izango dira; lehentasuna izango dute udalerrian erroldatutakoek. Ekainaren 4ra arte eman ahalko da izena.
Hamabost eguneko bi txandatan banatu dituzte udalekuak; lehena, ekainaren 28tik uztailaren 9ra, eta bestea, uztailaren 12tik 23ra. 10:00etatik 14:00etara izango dira, baina 09:30etik aurrera harrera zerbitzua eskainiko dute.
Aurtengo udalekuak ingurune “hurbil eta seguru batean” antolatu dituzte, eta euskal kultura ardatz duten jarduerak lehenetsiko dituzte. Gainera, jarduera guztiak haurren adinera egokituko direla zehaztu dute.
“Beste urte batez, herriko umeei aukera eman gura izan diegu udan herrian bertan euren aisialdiaz gozatzeko, eta oporraldiak jolasten eta ikasten igarotzeko”, adierazi du Juan Felix Naberan udalerriko alkateak. Bere ustetan, udalekuei esker “harremaka sendotu” ahal izango dituzte gazteek, izan ere, ikasturtean zehar herrian elkarrekin bizitzeko aukera gutxiago dute orain.
Udalekuak segurtasunez egitearen aldeko apustu sendoa egin dutela dio Naberanek: “Zerbitzu honegaz, lana eta familia uztartzeko erraztasunak ematea da gure helburua, eta helburu hori arazo barik egin ahal izateko, garai bereziki delikatu hauetan udalekuetan COVID protokoloa ezarri dugu, eta osasun segurtasuna bermatzeko neurri espezifikoak izango ditugu”.
Pandemia globalak sortutako egoera dela eta, jarduera guztiak herritik atera barik egingo dituzte. Eskulan tailerrak eta herri kirolak egingo dituzte herriko hainbat gunetan; frontoian, parkean edota kultur etxean esaterako.
Informazio gehiago gura izanez gero, Gautegiz Arteagako kultur etxera joan edota hurrengo zenbakira deitu beharko da: 94 627 15 63.
