Bisitarien datuak "oso positiboak" izan dira Urdaibai Bird Centerren
25.092 pertsona gerturatu ziren zentrora. Modu birtualean, berriz, 290.114 familia eta norbanakok behatu zituzten Urdaibaira gerturatutako 250 hegazti espezie desberdinetako batzuk.
Zentrora gerturatutako bisitariak hegaztiak behatzen. Argazkia: Urdaibai Bird Center Urte askotako bisitarien joan-etorria eten du SARS-CoV-2 birusak sortutako pandemiak. Egoera latza da, konfinamendu eta mugikortasun murrizketak baitira eguneroko gaiak. Errealitate horrek bisitari atzerritarrak Urdaibai Bird Centerrera gerturatu ez izana eragin du, baina iazko bisitarien datuak “oso positiboak” direla ondorioztatu duta zentroko arduradunek.
“2020. urtea oso ezohikoa izan da denontzat. Hala eta guztiz ere, urte oso oparoa izan da gure zentroarentzat”, diote zentroaren arduradunek. Izan ere, guztira, 25.092 pertsona gerturatu ziren Gautegiz Arteagako zentrora, baina «”askoz gehiago” izan ziren modu birtualean pantaila txikien bitartez Urdaibaiko natura ikusi ahal izan zutenak. Zehatz esateko, 290.114 familia eta norbanakok bistaratu zituzten birtualki Urdaibaiko padurak eta horietan zeuden hegaztiak.
“Etxeko konfinamendua ezarri zenean, Espainiar Estatu osoko milaka pertsona Urdaibaiko paduretako zuzeneko emanaldietara gehitu ziren, eta Biosfera Erreserbak eskualde eta Euskal Herritik kanpo lortu zuen oihartzuna apartekoa izan zen”, azaldu dute zentroko kideek.
Flamingoak ikusi ahal izan ziren Urdaibaiko paduretan. Argazkia: Urdaibai Bird Center
Gorabehera askoko urtea.
2020a bisitarien “fluxu interesgarri” batekin hasi zuten Urdaibai Bird Centerren, nahiz eta COVID-19aren eraginez “bat-batean etenda” geratu zen. Hilabete horietan zuzeneko emanaldiak izan ziren protagonista nagusiak.
Udan, baina, Urdaibai Bird Centerrera eta bertako behatokietara egindako bisitarien datuak “harrigarriak” izan direla diote hegaztiak ikusteko zentroko arduradunek. Hain zuzen, 2019ko datuekin alderatuta, %10 egin zuten gora. Zehatz esateko, 11.105 pertsona iritsi ziren Gautegiz Arteagako gune horretara. Hala ere, atzerriko bisitarien presentzia ia “hutsaren hurrengoa” izan dela zehaztu dute. Bizkai, Araba eta Gipuzkoa eta Espainiar estatuko bisitariena, aldiz, areagotu egin zen uda garaian.
Udazkenean eta neguan, mugikortasuna berriro murriztearen ondorioz, zentrora egindako bisitek behera egin dute berriro. “Hala eta guztiz ere, zuzeneko emanaldi birtualek datu oso interesgarriak eman zituzten”. COVID-19aren ondorioz, herritarrak etxean sartuta egon behar izan ziren iaz, baina naturak bere egunerokotasunean jarraitu zuen.
Hori horrela, Urdaibaiko biodibertsitatearen paradisuan horren garrantzitsuak diren bisitariek ez zuten hutsik egin. 250 hegazti espezie inguru izan ziren Urdaibai kolorez eta alaitasunez bete zutenak. Aipatzekoak dira arrano arrantzalea, zezen-txoria eta hegoaldetik gerturatutako flamengo bitxikiak. “Artikotik Saharaz azpiko Afrikarako bidaiak etengabeak izan dira Urdaibain”.
