Frontenisean jokatzeko aukera ematen du Arkupek
Telefonoz, Internetez zein posta elektronikoz izena eman daiteke.
Gernika-Lumoko Arkupe Pilota Taldeak berritasun nagusi bategaz hasi du ikasturtea. Klubak frontenisean jokatzeko aukera zabaldu du, lehenengoz.
Izena emateko hainbat modu daude. Telefonoz, 680 28 13 55 edo 676 29 34 20 zenbakietara deituta, arkupepilota@hotmail.com helbide elektronikora idatzita edo www.orduguztietan.com webgunearen bidez izena eman daiteke. Ikasturte osoan zehar izena eman daitekeela gogora ekarri dute.
“Euskal pilota ez da bakarrik esku pilota eta pala. Horiek ezagunenak dira, baina badaude modalitate gehiago. Gainera, eskaera herritik bertatik dator. Gazteek kirola egitea eta kirola bultzatzea nahi baldin badugu, Arkupe irekita egon behar da. Momentuz zazpi gazte daude, bata 2001ean jaiotakoa da, eta besteak 1997an”, azaldu du Jabi Gelbentzu Arkupeko kideak. Herrian kirola zabaltzea eta herriak kirolekin girotzearen garrantzia azpimarratu du: “Eta euskal pilota bultzatzea da dena bultzatzea. Arkupen lan polita egiten ari gara euskal pilotaren alde, eta urte guztian dago aukera edozein modalitatetan izena emateko”.
Kadete mailatik gorako federatuei (2006an edo aurretik jaiotekoentzat) zuzendutako eskaintza da, eta entrenamenduak Urbietako frontoietan izango direla jakinarazi dute. Udala hobekuntza lanak egiten ari denez bertan, eta Eusko Jaurlaritzaren datorren asteko dekretuaren zain daudenez, baldintza berriak ezagutu ostean zehaztuko dute egutegia: “Dekretuaren arabera egingo dugu antolaketa”.
