15. postuan sailkatu da Maria Zorroza Skymasters Munduko Txapelketako finalean
Zapatuan [urriak 19] lehiatu zuten 70 bat mendi korrikalarik proba, Limone Sul Gardan (Italia). Lasterketako sailkapen orokorrean 44.a izan zen, eta Migu Run Skyrunner World Series denboraldia 21. postuan bukatu du gernikarrak.
Maria Zorroza Munduko Txapelketako finalean lehiatzen. Argazkia: Skyrunning Maria Zorroza Iriondo gernikarrak 15. postuan (04:15,50) bukatu du Limone Sul Gardan (Italia) lehiatu duten Skymasters Munduko Txapelketako finala, emakumezkoen sailkapenean (44.a izan da probako sailkapen orokorrean).
Zapatuan [urriak 19] zuten hiztordua munduko mendi lasterkari onenek Limone Sul Gardan, eta horien artean egon da Zorroza. Finalera sailkatzea zen gernikarraren erronka nagusia urte hasieran, eta Trasvulcania (La Palma, Kanariak) lasterketan lortu zuen dagoeneko, maiatzean.
Euripean batu ziren 70 bat gizon-emakume irteera puntuan, eta gogotsu ekin zioten aurretik zituzten 27 kilometro eta 2.600 metroko desnibel positiboari.”Oso parte hartzaile gutxi egon gara, baina maila oso altukoak”, adierazi du Zorrozak.
Gernikarrak “bereak eta bi” ikusi behar izan zituen lasterketan. 15. kilometroan izandako txakalaldiak eraginda zenbait postu galdu zituen, eta hambosgarren helmugaratu zen: “Ez nuen ezer galtzeko, eta arriskatzera atera naiz, baina azkenean asko sufritu dut txakalaldiagatik”. Gorpuztari buelta ematea lortu zuen: “Sei postu atzera egin nituen, eta behin errekuperatuta, oso gustora bukatu dut lasterketa”. Probaren bukaeran taldekideak eta prestatzaileak zoriondu zituen, “bidaia honen parte izateagatik” eskerrak emanez.
Irabazleak. Denisa Dragomirrek 3 ordu eta 36 minututan bukatu zuen proba, eta Sheila Avilesek hiru minutu gehiago behar izan zituen. Hirugarren postuan Marcela Vasinova sailkatu zen (03:51,35). Hala ere, Migu Run Skyrunner World Series denboraldia Avilesek bereganatu du, eta Zorrozak 21. postuan bukatu du.
Gizonezkoei dagokienez, Ruy Udea izan zen azkarrena (03:03,15), eta Oriol Cardona (03:03,27) zein Christian Mathys (03:08,12) izan zituen atzetik. Udeak irabazi du Migu Run Skyrunner World Series denboraldia.
