Uztailean zinea eta musika emanaldiak egongo dira astero, Auditorioan
Gernika-Lumoko Kultur Etxeak udan kultur eskaintza areagotzeko helburua dauka. Hurrengo urteetan udako programazioa indartzen eta bultzatzen jarraitu gura dute
Herritarrak iazko zine saio batean, Auditorioan. Gernika-Lumoko Kultur Etxeak berritasunekin hasiko du uztaila. Zenbait urteren ostean, kaleko zinema berreskuratu zuten iaz, eta aurten, horri musika emanaldiak gehitu dizkiote.
Uztaileko martitzenetan eskainiko dute zinea Seber Altube Auditorioan, eta leku berean, kontzertuak emango dituzte, eguenetan. Euria bada, Elai Alai aretoan ikusiko dituzte pelikulak, eta musika emanaldiak, ostera, Lizeo Antzokian izango dira.
Kristina Arana Gernika-Lumoko Kultur Etxeko zuzendariaren berbetan, kultur programazioa urte osoan zehar garatzea dute helburu: “Udan gure kultur eskaintza areagotu behar zela uste genuen. Orain arte neguan gauza gehiago egin izan dira, baina udan ez horrenbeste. Herriko auditorioa ere aprobetxatzea ere bada asmoa. Hasiera da. Hemendik hasiko gara eta ikusiko dugu hurrengo urteetan ea udako programazioa zelan indartu eta bultzatzen dugun”.
Momentuz, herriko musika taldeentzat plaza bihurtuko dute Auditorioa: “Musika oso bizi dago Gernikan; musika talde asko daude, eta orduan, pentsatzen dugu herriko taldeei bultzada bat eman behar zaiela. Lehen egunean salbu, beste egun guztietakoak gernikarrak dira. Lehen udan musika jardunaldi batzuk egiten ziren, eta hori apur bat berreskuratu gura izan dugu, beste maila batean”.
Gazteak erakartzea ere bada euren helburua: “Kultur Etxera edo bertan egiten diren gauza askotara helduagoak etortzen dira. Uste dugu hau badela eurak erakartzeko modu bat; beste ekintza kultural batzuetara bideratzeko modu bat izan daitekeela”.
EGUTEGIA:
– UDAKO ZINEMA:
- Uztailak 2: Campeones (gaztelaniaz).
- Uztailak 9: Mision Imposible: Fallout (gaztelaniaz).
- Uztailak 16: Sing Street (euskaraz).
- Uztailak 23: Aquaman (gaztelaniaz).
- Uztailak 30: Asterix (euskaraz).
-UDAKO MUSIKA:
- Uztailak 4: Anita y lo Peleles.
- Uztailak 11: Kicking alive.
- Uztailak 18: Belatz.
- Uztailak 25: Blaster M.
- Uztailak 29: Nebbian.
