Sanantonioak gazte zein helduentzako egitarau zabalagaz datoz
Bermeoko Erroxape Emakumeen Elkarteko kideek kontzertu txikia eskainiko dute Busturian. Bizkaia Esnea Txapelketaren finalak eta Emakumeen Bizkaiko Finala jokatuko dute Errigoitin.
Sardina errea jateko aukera edukiko dute Abiñagako hondartzara doazenek. Uda garaia iristear dago, eta beragaz batera, herri zein auzoetako jai egunak Busturialdea giro ederrean murgiltzeko prest datoz. Joan den asteburuan Arratzun eta Sukarrietan Maietz Pazkuak ospatu ondoren, Errigoitiko eta Busturiko herritarren txanda helduko da oraingoan.
Izan ere, San Antonio jaiekin festa giroak hartuko ditu auzoak datozen egunetan. Busturikoek bihar San Antonio Egunean ospatuko dituzte jaiak Abinagako hondartzan. Eguerdian batuko dira meza nagusia entzuteko, eta meza bukatu bezain pronto, gelditu barik ariko dira.
Trikitilariek girotuko dituzte herriko kaleak, eta tabernaz taberna kalejira egingo dute. Eguerdian, baina, bazkari herrikoian batuko dira. Aurtengo sanantonioen berritasuna Bermeotik iritsiko da busturiarrentzat. Izan ere, kostako herriko Erroxape Emakumeen Elkarteko kideek ikuskizun berezia eskainiko dute; kontzertu txikia emango dutela aurreratu dute. Egun bereziari amaiera ezin hobea emateko, su artifizialekin argituko dute gaueko zerua.
Kirolak nagusi Errigoitin. Errigoitikoek, berriz, hainbat egunetan luzatuko dituzte sanantonioetako ospakizunak.Ume zein nagusientzako jarduerez betetako egitaraua prestatu dute, kirol jarduerak protagonista direlarik.
Elizalden ohikoak egiten aridiren duatloi edota frontenis txapelketagaz batera, parkour eta skate tailerretan parte hartzeko aukera edukiko dute aurten bertaratzen direnek.
Domekan, bestalde, Bizkaia Esnea Pilota Txapelketa finala lehiatuko dute Zornotzako Lagun Onak taldeak eta Munitibarko Lea Ibarra Motrollok. Hain zuzen ere, hiru mailatan jokatuko dituzte finalak: benjamin, alebin eta txiki mailetan. Denek ala denek garaipena eskuratzeko borrokatuko dute.
Benjamin eta alebin mailetako bi norgehiagokak oso parekatuta daudela aurreratu dute arduradunek, eta txiki mailan, berriz, zornotzarrak direla faboritoak diote. Hala ere, lehia “estua” egongo dela uste dute antolakuntzakoek.
Finalak bukatuta, pilotagaz jarraituko dute Errigoitin, Emakumeen Bizkaiko Finala ikusteko aukera egongo baita. Elizaldeko frontoian, Orozkoko Gentzane Aldai eta Lemoako Ainhoa Romero pilotarien arteko lehia ikusi ahalko da. Txapelketako arduradunen berbetan, “partidu gogorra eta borrokatua” izango da, bi pilotarien arteko lehiak “oso estuak” izan baitira azkenaldian. Ligaxkako partiduan Romero nagusitu zen.
Egitaraua:
Errigotia.
Bihar, ekainak 13:
- 12:00. Meza.
- 14:30. Herri Bazkaria Ikuilu Alkartearen eskutik.
Etzi, ekainak 14:
- 18:30. Parkour Tailerra Elizaldeko tabernaren eskutik.
- 19:30. II. Frontenis Txapelketako finalerdiak.
- 20:30 Pintxopotea Elizaldeko tabernan.
Ekainak 15:
- 17:30. Errigoitiko IV. Duatloi Txiki. Parte hartzaileek bizikleta eraman beharko dute.
- Ostean. Umeen jolasak: Boloak, dardoak… Kamiseta tailerra ere egingo dute. Norberak bere kamiseta zuria eraman beharko du.
- 22:00. Abarkak jokoan kopla desafioa Ikuilu Alkartean. Ibai Amillategi, Julen Erezuma, Julenpo, Oihana Bartra, Mikel Goiriena eta Larra bertsolariek parte hartuko dute, musikariek lagunduta.
Ekainak 16:
- 11:00. Meza.
- Ostean. Euskal Dantzak Morgako Dantza Taldearen eskutik.
- 12:00. Umeentzako puzgarriak eta jolasak.
- 12:00. Bizkaia Esnea finalak, Lea Ibarra Motrollo eta Lagun Onak Zornotzaren artean. Gainera, Emakumeen Bizkaiko Finala, Gentzane Alday eta Ainhoa Romeroren artean.
- 17:30. Skate tailerra.
- 18:00. Tute txapelketa Elizaldeko tabernan.
- 19:30. 2. Frontenis txapelketako finala.
Busturia.
Bihar, ekainak 13:
- 12:00. Meza Nagusia Andoni Deunaren baselizan.
- Ondoren. Ohorezko agurra eta Etxebarria trikitilariak tabernaz taberna. Gainera, sardina erre jana.
- 14:30. Herri Bazkaria Abiñaburu jatetxean auzoko trikitilariak animatuta.
- 15:00. Erromeria Urandere itsasontzian.
- 16:30-20:30. Umeentzako gaztelu puzgarriak.
- 18:00. Meza Andoni Deunaren baselizan.
- Ostean. Bermeoko Erroxape Emakumeen Elkartearen ikuskizuna.
- 22:30. Su artifizialak.
