Bizkaia Esnea Txapelketako finalaurrekoak jokatuko dira Olabarriko jaietan, bihar
Olabarriko jaiak ospatuko dituzte bihar, eta egun osoko egitaraua prestatu dute Batbigu Errigoitiko Jai Elkarteak. Protagonismoa pilota partiduek izango dute, Bizkaia Esnea Txapelketaren finalaurrekoak jokatuko dituzte-eta.
Argazkia: Unai Arrizabalaga. Iritsi dira Olabarriko jaiak, eta pilota partiduak izango dira jaietako protagonista nagusiak. Izan ere, Bizkaia Esnea Txapelketaren finalaurrekoak jokatuko dituzte 12:00etan, Olabarriko frontoian.
Olabarriko herritarrentzako, baina, eguna 11:00etan hasiko da txupina jaurti bezain pronto. Gero, mezan elkartuko dira, eta handik frontoira hurbiltzeko aukera izango dute pilota gustuko dutenek.
Orain dela hilabete hasi zen Bizkaia Esnea Txapelketa Mendatan. Benjamin, alebin eta txiki mailetako txapelketa da, eta bihar jokatuko dituzte finalaurrekoak. Lehenengo norgehiagoka Lagun Onak Zornotza eta Olaburu Iurreta taldeen aurkakoa izango da, eta bigarrena, berriz, Danok Lagunak Ortuella eta Lea Ibarra Motrolloren artekoa.
Biak ala biak oso partidu estuak izango direla adierazi dute antolatzaileek: “Irabazteko faboritoak Iurreta eta Lea Ibarra diren arren, lehiatutako partiduak izango direla aurreikusten dut, estuak”. Iurretako eta Lea Ibarrako taldeek erraztasunez irabazi zituzten partiduak, hiru kategorietan irabaziz.
Zornotzako eta Ortuellako taldeek norgehiagoka gogorragoak izan dituztela zehaztu dute arduradunek, eta partiduak irabazteko “estutasunak” izan zituztela aitortu dute: “Bi partidu irabazi eta bakarra galduta sailkatu dira, baina finalaurrekoetan gogor arituko dira”.
Bizkaiko zortzi herrik hasi zuten txapelketa, eta horien artean egon ziren Bermeoko eta Gernika-Lumoko eskoletako pilotariak. Biek galdu zituzte partiduak, gernikarrek Lea Ibarra Motrolloren aurka, eta bermeotarrek zornotzarren aurka.
Kanporaketa guztiak jokatuta, finala ere Errigoitin ekainaren 16an izango dela zehaztu dute arduradunek, Elizalden. Iaz Ortuella eta Munitibar sailkatu ziren finalera, eta Ortuellak irabazi zuen.
Pilota partiduak bukatuta, jaiak jarraitu egingo du Olabarrin. Umeentzako puzgarriak egongo dira aukeran, eta 13:00etan pintxo potean bilduko dira herritarrak. Arratsaldean, 18:00etan, Zubi Barri Tabernan jokatuko duten Tute Txapelketagaz agurtuko dituzte jaiak.
