Bertsolaritzen bertso idatzien lehiaketa egingo dute domekan
18 urtera arteko ume eta gazteek parte hartuko dute lehiaketan, hiru mailatan banatuta. Mendatako frontoian 11:00etan hasiko dute lehiaketa, eta 13:30ean egingo dute sari banaketa.
20. Bertsolaritzen bertso idatzien lehiaketako parte hartzaileak. Argazkia: Mendatako Udala. Beste urte batez, Bertsolaritzen bertso idatzien lehiaketa egingo dute Mendatan. 22. aldiz egingo dute aurten, eta domekarako jarri dute hitzordua. 10:00etan hasita, goiz osoa igaroko dute bertan parte hartzaile eta ikusleek.
Oilargane elkarteak eta Mendatako Udalak antolatutako lehiaketan Busturialdeko, Zornotzako zein Munitibarko 18 urtera arteko ikasleek parte hartuko dute. Hiru mailatan banatuta lehiatuko dute, betiko legez; A kategorian, 13 urtez azpikoak egongo dira; B mailan, 13 eta 14 urtera artekoak, eta D mailan, berriz, 15 urtetik 18 urtera bitartekoak.
Guztira 350 lagun inguru parte hartu dute Bertsolaritzen lehiaketako kanporaketetan, eta antolatzaileek 100 lan inguru onartu dituzte. Txapelketak 80 pertsona inguru biltzen ditu urtez urte, eta domekako hitzorduak beste horrenbeste ikasle erakarriko dituela uste dute Oilargane elkarteko kideek. Izan ere, parte hartzaileek ondo pasatzeko aukera edukitzen dute, irudimenagaz jolastuz eta euskara landuz.
Lehiaketaren bitartez bertsoa bultzatzea bilatzen dute antolatzaileek, gazteek ikastetxeetan lantzen dutena praktikan jartzeko: “Eskualdean bertsoarekiko zaletasuna handia denez, umeek ikastetxeetan ikasten dutena praktikan jartzeko plaza eskaintzen diegu”.
Goiz osoko egitaraua. 11:00etan hasiko dute domekako lehiaketa, eta bertsolariek ordubete izango dute bertso idatziak egin eta aurkezteko. Hori baino lehen, baina, lehiakideek izena emateko aukera edukiko dute 10:30etik 11:00etara bitartean.
Epaimahaiak jasotako lan guztiak irakurri eta baloratu ostean jakinaraziko dituzte irabazleak nortzuk diren. 13:30erako aurreikusi dute sari banaketa. Gainera, bestelako aipamenak ere egingo dituztela jakinarazi dute antolatzaileek.
Gainera, eskualdeko herritarrei Mendatara gerturatzeko gonbitea egin diete antolatzaileek, ondo pasatzeko aukera bikaina dela esanez: “Ondo zainduta egongo dira bertaratzen direnak, entretenitzeko eta ondo pasatzeko aukera ederra da domekakoa”.
