Gernika FS, ligako txapeldun

Aretxabaletan hiru puntuak eskuratuta, Euskal Liga irabazi du talde gernikarrak. Bi jardunaldiren faltan eskuratu du ligako titulua. Denboraldi honetako helburu nagusiak bete dituzte jokalariek.

Aintzina Monasterio Maguregi

Gernika-Lumo

2019/03/25

Orain dela bi aste Hirugarren mailan jokatzeko txartela eskuratu zuen Gernika FSk, eta asteburu honetan ligako txapeldun geratu da.

Hain zuzen, bi jardunaldi barru amaituko dute liga. Asteburu honetan atsedenaldia dute, eta apirilaren 6an jokatuko dute etxeko azken partidua, Sestao FSren kontra. Gero, apirileko bigarren asteburuan amaituko dute liga Tolosalaren kontra, Tolosan.

“Liga modu honetan amaitzeagatik oso pozik gaude. Bi jardunaldiren faltan, txapeldunak gara eta ez dugu ezer jokatzen. Horrek, lasaitasuna ematen badigu ere, ez gara erlaxatuko. Lehiakorrak gara, eta falta zaizkigun bi partiduak irabazten ahaleginduko gara”, azaldu du Urtzi Mentxaka entrenatzaileak. Aurkariei hori zor dietela deritzo: “Eurak ere partiduak lehiatu nahiko dituzte; liderrari irabaztea beti da polita”.

Denboraldi honetan jarritako helburuak jokalarien lanari esker lortu dituztela gaineratu du, euren “prestutasuna izugarria” izan delako. Entrenamenduetan zein partiduetan erakutsi duten jarrera eskertu du entrenatzaileak. Era berean, babesleen laguntza eskertu du: “Eurak barik ezinezkoa litzateke egiten duguna egitea, eta aurrera jarraitzea”.

Zapatuan, 6-10 irabazi zion Aretxabaletako taldeari. Gernika FS nagusi izan zen partidu osoan zehar, baina, etxeko taldeak ez zuen amore eman, eta indartsu borrokatu zuen.

Partiduaren hasiera parekatua izan bazen ere, gernikarrek markagailuan aurretik amaitu zuten lehen zatia; 0-3ko emaitzagaz heldu ziren atsedenaldira. Bigarren zatian, 35-40 segundotan bi gol sartu zituzten aurkariek, eta horrek urduritasuna eragin zuen gernikarrengan. Hala ere, partiduaren kontrola berreskuratu zuten, eta garaipena bermatzeko errentari eutsi zioten. “Aretxabaletak ez zuen ezer jokoan, baina, maila eman zuen, eta ez zuen erritmoa jaitsi. Uste dut garrantzitsua dela jokoan ezer ez duten taldeek partidu amaiera arte borrokatzea eta lehiakorrak izatea”.

Falta zaizkien bi jardunaldietako aurkariengatik galdetuta, lehia “politak” espero dituztela adierazi du. Tolosak lehen itzulia oso ona egin duela dio, eta jokalari gazteak eta onak dituela. “Mikel Labakaren esperientziak ere lagundu diela uste dut. 2.B mailako jokalaria izan zen, eta seguruenik, hark asko erakutsiko zien”. Sestao ere talde ona dela gaineratu du, “azken segundora arte lehiatzen dena”. Jokalari gazteekin eta beteranoekin osatu dute taldea. “Hainbat denboraldi daramatzagu elkarren kontra jokatzen, eta lehia estua daukagu; ondo ezagutzen gara”. Etxean jokatuko dute euren kontra, eta Gernika-Lumora irabaztera etorriko direla argi dauka Mentxakak. “Baloia gura dugun bi talde gara; erasotzen dugunak, eta erasotzen defenditzen dugunak. Badakigu partidu zaila izango dela, borrokatua”.

Sailkapenari dagokionez, Gernika FS 47 puntugaz da liderra. Eskoriatza KE bigarrenak 38 puntu ditu, eta Scorpio hirugarrenak 37 puntu. Ondoren, Labastidako (35 puntu), Tolosako (32 puntu) eta Sestaoko (30 puntu) taldeak daude hirugarren posturako lehian.