200 bat mendigoizale batu ditu Demikuko XII. Mendi Martxak
Eguraldiak lagundu ez badie ere, giro polita izan dutela nabarmendu dute antolatzaileek. Parte hartzaile gehienek 25 kilometroko ibilbidea egin dute.
Atzo egin zuten Demikuko XII. Mendi Martxa. Azken urteotan legez, eguraldi txarrari aurre eginez burutu zuten martxa mendigoizaleek.
Hain zuzen, 155 parte hartzaile elkartu ziren ibilbide luzean. 08:30ean ermita paretik irten, eta Katilotxu, Montemoro, Busturia, Parisi eta Sollube zeharkatu ostean, hasitako leku berean amaitu zuten 25 kilometroko ibilaldia. 12 kilometroko martxa laburra, ostera, 48 pertsonak egin zuten.
Martxa luzekoek aterri hasi zuten ibilaldia, hego haizeak lagunduta. Baina, goizak aurrera egin ahala eguraldia zakartu zen, eta 10:00etan martxa laburrekoak irten behar zirenerako euri zaparrak bota zituen. “Jendeak ez zuen jakin irten edo ez. Ausartenek ibilbide osoa egin zuten, baina, batzuek apur bat egin, eta buelta hartu zuten. Ez zen ezertarako arorik egon. Baina, orokorrean giro oso polita eduki genuen; dena ondo atera zitzaigun eta oso pozik gaude”, azaldu dute antolatzaileek.
Federatuen artean erreferente bihurtu da Demikuko mendi martxa, eta horiek ez zuten utzik egin nahi izan. “Euren egutegian zehaztuta dute”. Urtero huts egiten ez dutenak asko direla esan dute antolatzaileek. Jendea oso animoso egon zela, eta esker ona adierazi zietela zehaztu dute: “Azken urteotan eguraldi txarra egin digu, eta arduratuta geunden. Baina, parte hartzaileek esan ziguten lasai egoteko, badakitelako neguko mendi martxa bat dela eta nora datozen”.