Elkarbizitzarako bidean presoen garaia "orain" dela aldarrikatuko dute etzi, Bilbon
17:00etan La Casillatik aterako da manifestazioa. Bilbora joateko autobusak antolatu dituzte eskualdeotan. Ondarroan eta Gernika-Lumon dispertsioagaz amaitzeko eskatu dute
“Ezberdinen arteko elkarrekintzan oinarrituta, elkarbizitza eta bakerako ezinbestekoa zaigun presoen arazoari irtenbidea emateko gizarte zibila aktibatu behar da”. Sarek eta Bakearen artisauek argi dute, eta presoen garaia “orain” dela arrazoituta, dispertsioarekin amaitzeko eskatuko dute zapatuan, Bilboko kaleetan zehar. 17:00etan La Casillan jarri dute hitzordua; handik abiatuko da mobilizazioa.
Bakegintza eta elkarbizitzaren bidean: orain presoak izango da aurten zabalduko duten leloa, eta, adierazi dutenez, ETAren desegitea eta armagabetzea eta gero, presoen aldia “orain” dela esan nahi diete Madrili eta Parisi: “Bake iraunkor integral baterako oinarriak gizartearen aktibaziotik etorri behar dira, eta horrek denon ardura eta ahalegina behar du. Bakearen bidea alde guztien eginkizuna da: jendartearena bere aniztasunean, elkarteena, instituzio-politiko zein instituzionalena, eta, noski, estatuena”.
Antolatzaileek urte luzeetan ezinezkoak izan diren aukera berriak zabaldu direla diote: “Garai berri baten aurrean gaude, eta jendarte bezala aurrera egiteko probestu behar gara. Elkartzen gaituen horretan jarri behar dugu indarra, behin betikoz sufrimendu ororen sorrerarekin amaitu ahal izateko”.
Bilboko manifestazioan aurten lehenengoz, sindikalgintza osoaren ordezkaritza egongo da, eta Herrialde Katalanetako ordezkaritza politikoa ezeze, preso dauden politikarien senideak ere egongo direla jakinarazi dute arduradunek.
Presoen alde Gabon Zahar egunean mobilizazioa egin zuten Gernika-Lumoko kaleetatik; Foruen plazan bukatu zuten.
Aurten lehenengoz, sindikalgintza osoaren partaidetza egongo da BilbonIraganetik “ezer baztertu eta ahaztu gabe” bidea egiten jarraitu behar dela diote Sarekideek, eta indarkeria guztien biktima guztiei zor zaien egia aitortu behar zaiela deritzote. Hala, errespetua eta errekonozimendua nabarmenduz elkarbizitza demokratikoa posible ikusten dutelako, etorkizun hobe bati ateak zabaltzeko eskatuko dute etzi. Orain Presoak dinamikak, azken hilabeteetan lortutako atxikimenduak eskertu eta txalotu gura izan ditu, “norbanako bakoitzak emandako urratsak beharrezkoak direlako”. Aldarriarekin bat. Gure Esku Dagok ere bat egin du dinamikaren aldarrikapenekin, eta etzi, Bilbon egingo diren manifestazioetan parte hartzeko deia egin die herritarrei, “giza eskubideen, elkarbizitzaren eta bakearen defentsan”. Bilboko manifestazioarekin bat egiteko deia egin dute baita ere Busturialdeko, Lea-Artibaiko eta Mutrikuko Sarekideek. Gernika-Lumon abenduaren 31an Orain Presoak adierazteko bete ziren kaleak, eta dispertsio politikak 29 bete dituela salatu zuten. Kepa Arronategi gaixotasun sendaezina duen preso gernikarraren kasua gogorarazi zuten, eta bera etxeratzea exijitu.
Garai berriagaz aukera berriak sortu direla deritzote Sareko kideekDispertsioari irudia jarri zioten Foruen plazan, eta sakabanaketak dirauen urte bakoitza adin bereko pertsona batekin ordezkatu zuten. Gainera, Bilboko manifestaziora joateko deia egin zuten: “Indarrak batu behar ditugu eta Bilboko kaleak giza eskubideez, konponbidez eta bakeaz bete behar ditugu”. Ondarroan, berriz, urtero legez, preso eta iheslarien eskubideen aldeko Olentzeroren kalejira egin zuten abenduaren 24an. Kalera Kalera! Badator Olentzero oihukatu zuten alde zaharrean hasi eta Alamedara arte. Autobus zerbitzuak. Lea-Artibai eta Mutrikun, Bilbora joateko autobusak antolatu dituzte. Busturialdean, baina, lineako autobusetan joango dira. Mutrikun Zubixa herriko tabernan eman behar da izena, eta autobusa 15:30ean aterako da Txanbolingo biribilgunetik. Ondarroan, Anaitasuna eta Kulixka tabernetan apunta daiteke; autobusa 15:00etan aterako da Zaldupeko Zubitik. Markina-Xemeingo herritarrek Txokun eta Alarabin emon beharko dute izena, eta etxebarriatarrek Iru Bide tabernan. Autobusa 15:15ean aterako da Bilborantz. Lekeitiarrek, berriz, Guzurmendin, Aralden eta Galarrenan apuntatu daitezke. Lekeitioko autobusa 15:15ean aterako da Mandaskatik.
