Kaltzada egoitzaren aldeko zesta-punta desafioa jokatuko dute Gernika-Lumon
Iñaki Osa Goikoexea-Eric Irastorza/Mikel Egiguren-Imanol Lopez izango da partida nagusia
Aurten Gabonetan jokatuko dute egoitzaren aldeko klasikoa lehen aldiz. Orain arte udan jokatzen zen baina puntista onenak Gernika-Lumoko pilotalekura ekartzeko asmoagaz aldatu dute data. Zapatuan 21:00etan hasiko da Iñaki Osa Goikoexea eta Eric Irastorza bikotearen eta Mikel Egiguren eta Imanol Lopezek osatutako bikotearen arteko desafioa.
Desafioa izango da, eta ez bakarrik partida. Euskal Herrian luzeenak diren bi frontoietan jokatuko dute joaneko eta itzulerako partidak edukiko dituen desafioa: 57 metroko luzera daukan Gernikako Katedralean joanekoa eta 56 metro dauzkan Donibane Lohitzunekoan itzulerakoa, abenduaren 27an 18:00etan. Lehen aldia izango da Euskal Herrian halako desafio bat bi partidatara jokatzen dena. Mexikon jokatua daukate halako desafioa, hiru aldiz, eta hiruretan izan ziren garaileak Goikoetxea eta Irastorza. Kaltzada egoitzaren aldeko klasikoaren baitan, partida nagusiaren aurretik Hormaetxea-Salegi/Olha-Basque partida ere jokatuko da.
Omenaldia. Partidarekin batera Jose Antonio Illoro Txikito de Bolibar omenduko dute Gernika-Lumoko Katedralean, “zesta-puntaren historiako handienetako bat”. Ehunka puntista zeuden garaian izar handienetakoa izan zen Illoro eta besteak beste Tampa, Ocala, Hartford, Daytona, Bridgeport, West Palm Beach, Orlando eta Milforden aritu zen, Euskal Herriko, Mexikoko eta Caracasko frontoiez gain. Daytonan kinielen errekorra kendu zion Orberi, 156 garaipenekin. Tampan sei aldiz irabazi zuen Singlea deitzen zioten banakako txapelketa eta hamar denboralditan aurrelari onena izan zen.
1979-1980 denboraldia ere oso aberatsa izan zen Txikito de Bolibarrentzat. 219 kiniela irabazi zituen guztira, 49 singlean. 1982an Munduko Txapelketa jokatu zen Donibane Lohitzunen eta irabazi egin zuen Jose Agustin anaiagaz batera.
Lopez, Egiguren, Irastorza eta Goikoetxea. Argazkia: Jai Alai
Txikito de Bolibar.
